Osy kúnderi astanalyq delegasııa óńirdegi iri kásiporyndardy aralap, olardyń tynys-tirshiligimen tanysyp shyqqan edi. «О́ńiraralyq yntymaqtastyqty nyǵaıta túsý úshin mundaı qarym-qatynastyń mańyzy óte zor» deıdi Batys Qazaqstan oblysy ákiminiń birinshi orynbasary Igor Steksov.
Batys Qazaqstan oblystyq ákimdiginde ótken qorytyndy kezdesýge Astana qalasy ákiminiń orynbasary Ermek Amanshaev bastaǵan delegasııa – Astana qalasy ınvestısııa jáne kásipkerlik basqarmasy, «Astana Innovations» AQ, «Astana»ÁKK UK» AQ, «Astana Konvenshn Bıýro» JShS, «Smartnet» JK sekildi memlekettik jáne jekemenshik mekeme-uıym ókilderi qatysty.
Árıne, óńirler arasyndaǵy iskerlik qarym-qatynas búgin bastalyp otyrǵan joq. Steksovtyń aıtýynsha, bıylǵy aqpan aıynda Batys Qazaqstan oblysynyń delegasııasy Astanada bolyp, Elordada qolǵa alynǵan jaqsy úrdistermen jaqyn tanysyp qaıtqan. Osy kezdesýler nátıjesinde birneshe kelisim-shartqa qol qoıyldy. Oral qalasynda qolǵa alynǵan «aqyldy qala» jobasyn júzege asyrýda Astananyń is-tájirıbesi óte kerek.
- Smart city, noý-haý, sıfrlandyrý salalarynda qazirdiń ózinde tyǵyz iskerlik baılanystyń negizi qalanyp, júzege asyp jatyr, - deıdi Igor Steksov.
Buǵan deıin Oraldaǵy metall jabyny, proflıst, sondaı-aq gaz, sý, kárizge arnalǵan dıametri 20-dan 1600 mıllımetrge deıingi polıetılen, polıpropılen qubyrlaryn shyǵaratyn «Oral saýda-ónerkásip kompanııasy» JShS, álemdik básekege qabiletti shyny ónimderin shyǵaratyn «Steklo Servıs» JShS sehtarynda bolǵan astanalyq delegasııa ókilderi mundaı áriptestik eki jaqqa da paıdaly bolatynyn maquldap otyr. Máselen, oraldyq «Steklo Servıs» JShS óniminiń 31%-y Reseı Federasııasyna ımporttalady, Astanadaǵy «EXPO-2017» kórme qalashyǵy qurylysyna da oraldyq shyny keńinen paıdalanylyp, sapalylyǵyn kórsetken.
О́ńirlerdiń bir-birimen iskerlik baılanysqa túsip, mıdaı aralasýy, kásipkerlik pen óndiristiń barlyq salasynda tyǵyz qarym-qatynas jasaýy – Elbasynyń tikeleı tapsyrmasy. Astana qalasy ákiminiń orynbasary Ermek Amanshaev Elordanyń 20 jyldyǵyna oraı Memleket basshysynyń tapsyrmasyna sáıkes keshendi is-sharalar jospary jasalyp, kóptegen bastama qolǵa alynǵanyn aıtady. Astana – búginde álem moıyndaǵan bastamalar alańy, munda aı saıyn dúnıejúzilik deńgeıdegi sharalar ótip jatady, álemdegi ınnovasııalyq jańalyqtar da tez jetedi.
Kezdesý barysynda Astanada júzege asyrylyp jatqan naqty jobalar tanystyryldy. Astana qalasy ınvestısııa jáne kásipkerlik basqarmasy basshysynyń orynbasary Erlan Bekmyrzaev bolashaqta el men el emes, qala men qala kóbirek básekelestikke túsetinin aıtady. Álemdik McKinsey Global Institute zertteýshileriniń pikirinshe 2025 jyly álemniń 60% baılyǵyn jer betindegi 600 qala óndiretin bolady. Qazirdiń ózinde jumyr jer betindegi qalalyqtar sany aýyldyqtardan asyp ketken. Dúnıejúzilik bul úrdisti Qazaqstan da eskermese bolmaıdy, elimizde iri megapolısterdi damytý, qalalardyń damýy men ınnovasııa jetistikterin jappaı ıgerý áselesine erekshe kóńil bólinip otyrǵany sondyqtan.
Astana qalasy men Batys Qazaqstan oblysy kásipkerleriniń kezdesýi barysynda astanalyqtar Elordada qolǵa alynǵan bastamalar men baǵdarlamalardy egjeı-tegjeıli tanystyryp berdi. «Astana Innovations» AQ tóraǵasy orynbasary Serik Qusaıynov Elordadaǵy «Smart City» tujyrymdamasy men qala ekonomıkasyn sıfrlandyrý boıynsha qolǵa alynǵan ınnovasııalyq jobalar týraly aıtsa, «Smartnet» JK ıesi Taıyr Qojahmetov páter ıeleri kooperatıvteriniń qyzmetin avtomattandyrý boıynsha «E-PÁK» júıesin engizýdiń tetikterin túsindirdi.
Kezdesý sońynda Ermek Amanshaev pen Igor Steksov Astana qalasy men Batys Qazaqstan oblysy ákimdigi arasynda yntymaqtastyq jónindegi memorandýmǵa qol qoıdy. Sondaı-aq Batys Qazaqstan oblystyq kásipkerlik jáne ındýstrııalyq-ınnovasııalyq damý basqarmasy men Astana qalasy ınvestısııa jáne kásipkerlik basqarmasy ózara kásipkerlik baılanystardy damytý týraly, Oral qalasy ákimdigi men «Astana Innovations» AQ «Smart City» tujyrymdamasyn júzege asyrý boıynsha, «Oral» ÁKK UK» AQ men «Astana»ÁKK UK» AQ ınvestısııa jáne memlekettik-jekemenshik áriptestigi salalary aıasynda, Batys Qazaqstan oblystyq kásipkerlik jáne ındýstrııalyq-ınnovasııalyq damý basqarmasy men «Astana Konvenshn Bıýro» JShS ishki jáne halyqaralyq týrızmdi damytý máseleleri boıynsha, oraldyq «Agran» JShS men «Astana»ÁKK UK» AQ ózara áriptestik haqynda memorandýmdarǵa qol qoıdy.
Qazbek QUTTYMURATULY,
«Egemen Qazaqstan»
Oral qalasy
Sýretti túsirgen Temirbolat Toqmámbetov
