Shymkent qalasyndaǵy BIIK sport kesheninde ótken chempıonattyń alǵashqy jarys kúninde erler 56 kıloda baq synasa, qyzdar 48 jáne 53 kılo salmaqta ózara synǵa tústi. Erler arasyndaǵy saıysta birinshi oryndy Rıo Olımpıadasynyń qatysýshysy Arlı Chonteı (115+136) jeńip aldy. Qyzdar arasyndaǵy 48 kılo salmaqta 16 jastaǵy Iýlııa Potasova (72+88) jeńimpaz atansa, 53 kıloda jasóspirimder arasyndaǵy álem chempıonatynyń kúmis júldegeri Áıgerim Aýylbek (75+90) teńdessiz dep tanyldy.
Chempıonattyń ekinshi kúni tartysqa toly boldy. Jarysty 62 kılo salmaqtaǵy erler bastady. Bul salmaqta Rıo Olımpıadasynyń qola júldegeri Farhat Harkıge teń keler eshkim bolmady (115+150). Julqı kóterýde onyń bir ǵana múmkindikti paıdalanǵany jeńiske jetýine esh kedergi bolmady. Qyzdar arasynda 58 kıloda Sáýle Sádýaqasova (91+121) men 63 kılo salmaqta synǵa túsken Ásem Sadyqova el chempıony atandy.
Jarystyń úshinshi kúni 69 jáne 75 kılo salmaq boıynsha erler jáne qyzdar básekesi ótti. Altyn medal Almaty oblysynyń ókili Anatolıı Savelevke (131+168) buıyrdy. Al qyzdar saıysynda 69 kılo salmaqta Nadejda Lıhacheva (115+140) úzdik dep tanyldy. 75 kıloda Altynaı Dámenge (99+125) teń keler eshkim bolǵan joq.
El birinshiliginiń tórtinshi jarys kúninde qyzdar básekesi máresine jetti. 90 kıloda jastar arasyndaǵy álemniń bes dúrkin jeńimpazy Nadejda Nogaı (111+132) eshkimge des bermese, 90 kılodan joǵary salmaqta Aızada Múptildá (110+138) óz salmaǵynyń úzdigi atandy. Sondaı-aq bul kúni 77 kılodaǵy erler arasynda synǵa túsken 2017 jylǵy Azııa chempıony Aıdar Qazov (143+181) sózsiz jeńimpaz atandy. Besinshi kúngi jarysta Rıo Olımpıadasynyń qola júldegeri Denıs Ýlanov 85 kılo salmaqta top jarsa (170+205), 94 kıloda 2015 jylǵy Azııa chempıony Rústem Sybaıǵa (156+210) teń keler qarsylas tabylmady.
Chempıonattyń sońǵy kúninde jarys jolyna 105 jáne +105 kılo salmaqtaǵy aýyratletter shyqty. 105 kıloda Ibragım Bersanov qos saıys boıynsha 377 kılo (175+202) salmaqty ońaı eńserip, chempıon boldy. 2016 jylǵy Rıo Olımpıadasynyń qola júldegeri Aleksandr Zaıchıkov (170+201) ekinshi oryndy qanaǵat tutty. Al +105 salmaqta Selımhan Ábýbakarov top jardy. Ol qos saıys boıynsha 395 (175+220) kılony baǵyndyrdy.
Aýyr atletıkadan Qazaqstan kýbogy men chempıonatynyń qorytyndysy boıynsha Qyzylorda oblysynyń quramasy 189 upaımen birinshi oryndy jeńip aldy. Ekinshi oryndy Almaty oblysy (184 upaı), úshinshi oryndy Almaty qalasynyń aýyratletteri (181 upaı) ıelendi.
Endi aýyr atletıkadan el chempıony atanǵan sportshylar Djakartada ótetin Azııa oıyndaryna daıyndalatyn bolady.
Álı BITО́RE,
«Egemen Qazaqstan»
