Osynaý mereıli sátte fılarmonııa ujymy áıgili kompozıtor, Qazaqstannyń halyq ártisi Shámshi Qaldaıaqovtyń shyǵarmashylyǵyna arnalǵan «Án padıshasy – Shámshi aǵa» atty konserttik baǵdarlama uıymdastyryp, kórermen nazaryna usyndy. Shámshi ánine sýsaǵan áýlıeatalyqtar bul kúni «Balasaǵun» ortalyq konsert zalyna kóptep jınalyp, áýeli ataqty kompozıtordyń ómir jolyna arnalǵan derekti fılmdi tamashalady.
Árıne Shámshi taǵdyryna arnalǵan, Shámshi shyndyǵyna boılaǵan fılm kópshilikti beıjaı qaldyrmady. Tipti kompozıtordyń «Ana týraly jyr» ániniń ómirge kelý tarıhy aıtylǵanda kórermen kózderine jas úıirildi. Bala Shámshiniń anasy Saqypjamaldy saǵynyp, baqshada aǵyl-tegil jylap otyrǵanyn kórgeni jóninde Raıhan Qaldaıaqova tebirene estelik aıtyp, bul áıgili ánniń ómirge kelýine osy jaǵdaıdyń sebepker bolǵanyn jetkizdi.
Án padıshasyna arnalǵan konsert qazaq ult aspaptar orkestriniń súıemeldeýimen Shámshi Qaldaıaqov ánderinen quralǵan poppýrımen bastaldy. Atalǵan orkestrge Qazaqstannyń eńbek sińirgen qaıratkeri Muhtar Rahmanqulov jetekshilik etti. Konsert barysynda orkestrdiń súıemeldeýimen Dınara Dıhanbaeva kompozıtordyń «Qushaq jaıǵan qandaı adam?», Rázııa Mádihanova «Aq mańdaılym», Dıas Ábilekov pen Dýlat Jasuzaqov «Arys jaǵasynda» ánderin tamyljyta oryndasa, «Káýsar» vokaldyq, «Alataý» folklorlyq ansambli men «Asyl ájeler» ansambliniń oryndaýyndaǵy Shámshi ánderi tyńdarman kóńilinen shyqty. Sonymen qatar vals koroline arnalǵan ánder de sahna shyraıyn arttyrdy. Baǵlan Omarovtyń «Jalǵyz qaıyq» ánin Janatbek Kádirov, al Qaldybek Qurmanáliniń «Shámshi aǵa» ánin «Alataý» trıosy oryndady. О́zge de ónerpazdar Shámshi ánderin naqyshyna keltire oryndap, kórermen kózaıymyna aınaldy. Konsert sońynda fılarmonııa ónerpazdary Shámshi Qaldaıaqovtyń «Meniń Qazaqstanym» ánin, ıaǵnı Qazaqstan Respýblıkasynyń Memlekettik Gımnin qosyla shyrqap, tyńdarmandar júregin terbetti.
Hamıt ESAMAN,
«Egemen Qazaqstan»
Jambyl oblysy
