Bıyl órt qaýipti kezeńi bastalǵaly aımaqta 18 orman jáne dala órtteri oryn aldy, sondaı-aq dalada 105 ret ot tutanǵan. Demek, ormandaǵy órttiń negizgi sebebi adam faktory bolyp tur. Sondyqtan ormanda órt qaýipsizdigi erejesin saqtaý máselesi qazir óte ózekti bolyp sanalady. Qostanaı oblysynyń Tótenshe jaǵdaı departamenti qyzmetkerleri orman alqabynda aldyna ala reıdter júrgizip, ormanshylarmen birlesip jumys júrgizýiniń arqasynda, órttiń tutaný oshaǵyn ýaqytyly aıqyndap jáne ottyń beleń alyp ketýin boldyrmaıdy.
Qostanaı oblystyq Tabıǵı resýrstar jáne tabıǵat paıdalanýdy retteý basqarmasy jaqynda Qostanaı qalasyna jaqyn ormandy alqaptarda kezekti birlesken reıd ótkizdi. Demalýshylarǵa ormandarda ot jaǵýǵa jol bermeý týraly áńgimeler ótkizildi, túsindirý jadynamalar taratyldy.
«Ormanda ot jaǵý qaýipti» dep túsindirý demalýshylarǵa jetkilikti bolýy tıis. Biraq keıbir adamdar osyndaı eskertýlerdi tyńdamaıdy, tabıǵı baılyǵymyzǵa janashyrlyq kórsetpeıdi. Sondyqtan olarǵa aıyppul salyp, shara qoldanýǵa týra keledi» dedi departamenttiń О́rt qaýipsizdigi salasyndaǵy baqylaý jáne profılaktıkalyq qyzmet basqarmasynyń memlekettik órt baqylaý tobynyń aǵa ınjeneri, azamattyq qorǵaý leıtenanty Erlan Bısen.
Bıyl kún jylyna bastaǵannyń ózinde TJD qyzmetkerleri «Ormanda órt qaýipsizdik erejesin buzý» QR ÁQBtK 367-baby jáne «Qazaqstan Respýblıkasynyń órt qaýipsizdik erejesin buzý» QR ÁQBtK 410-baby 1-bólimi boıynsha 6 adamǵa ákimshilik hattama jazǵan Endi budan bylaı ormanda ot jaǵyp jáne kaýap pisirý úshin mangalda, tipti kómirdi tutandyrǵanyna adamdarǵa 5-ten 10 ETEK-ke deıingi aıyppul salynatynyn da aıtty Erlan Bısen. Orman mańaıynda ot jaǵýǵa, dalada qurǵaq shópti órteýge qatań tıym salynady.
Názıra Járimbet
«Egemen Qazaqstan»
Qostanaı
