Taıynsha aýdanynyń ákimi qyzmetin atqaratyn Vladımır Dýdov Ǵ.Músirepov aýdanyna basshylyq etken tusta «Nátıjeli jumyspen qamtý jáne jappaı kásipkerlikti damytý» baǵdarlamasyna qatysýshy týǵan qaryndasyna, aýdan ákiminiń orynbasary Altynshash Taıshybaeva týǵan sińlisine páter alýǵa kómektesip, zań buzýshylyqtarǵa oryn bergen. Sondaı-aq berilgen baspanalardyń aýmaǵyna qatysty da zańǵa qaıshy jaıttar belgili bolǵan. Máselen, bir bólmeli páter alýǵa ótinish bergen azamatqa aýmaǵy 56 sharshy metr quraıtyn baspana bosatylǵan. Eki bólmeli páter alýy tıis otbasyǵa úsh bólmeli baspananyń kilti tapsyrylǵan. Tipti otbasy quramy jaıly anyqtama da suralmaǵan.
«Aýdan ákimi de, onyń orynbasary da baspana berý jónindegi komıssııanyń músheleri bola turyp osy áreketteri arqyly memlekettik qyzmetke nuqsan keltirdi», deıdi sybaılas jemqorlyqqa qarsy is-qımyl departamenti tergeý basqarmasy basshysynyń orynbasary Serǵalı Túsipov.
Taıynsha aýdanynyń ákimi Vladımır Dýdov eki azamatsha da baǵdarlamaǵa qatysýshy bolǵandyqtan ótinishterin qabyldamaýǵa esh negiz joq. Men qaryndasyma páter berý boıynsha daýys berýge qatysqan joqpyn. Sheshimdi ózge komıssııa músheleri shyǵardy, degen ýáji komıssııa múshelerin sendire qoıǵan joq.
Ádep keńesinde V. Dýdovtyń, Ǵ. Músirepov aýdany ákiminiń orynbasary Talǵat Ábilpeıisovtyń kásipkerlerden zańsyz qarjy talap etkeni de rastaldy. Keńes músheleri olqylyqtarǵa jol bergen shendiler atqaryp otyrǵan qyzmetterine tolyq saı emes degen sheshim shyǵardy.
О́mir Esqalı,
«Egemen Qazaqstan»
Soltústik Qazaqstan oblysy
