«Nur Otan» partııasy oblystyq fılıalynyń jıynynda tehnıkalyq jáne kásiptik bilim berý baǵdarlamalarynyń oryndalý jaıy talqylanyp, birqatar mindetter belgilendi. Fılıal janyndaǵy «Bilim» komıssııasynyń tóraıymy Ǵafýra Bóstekova óz baıandamasynda Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda barshaǵa tegin kásiptik-tehnıkalyq bilim berý jobasyn júzege asyrýdy odan ári jalǵastyrý mindeti qoıylǵanyn, bul oraıda oqytýdyń mazmundylyǵy zamanaýı tehnıkalyq turǵydan qoldaý tabýdyń, sıfrly bilim berý resýrstaryn damytýdyń, keń jolaqty ınternetpen, beınequrylymdarmen jabdyqtaýdyń mańyzyna toqtaldy. Kásiptik-tehnıkalyq bilim berý úrdisin jetildirýdiń múmkindikteri kóp. Jumys berýshiler oblysta bilikti jumysshy kadrlaryna suranystyń joǵary ekenin jete eskere otyryp, joǵary jaqtyń nusqaýyn kútpeı-aq bastamashyldyq kórsetkenderi, baǵdarlamaǵa belsene atsalysqandary jón, dedi ol.
Bilim basqarmasy basshysynyń orynbasary Vladımır Tkachenko óz esebinde kolledjder men kásiporyndar arasyndaǵy ekijaqty kelisimder aıasynda stýdentterdiń óndiristik tájirıbeden ótetinine, úshten birine eńbekaqy tólenetinine, óz kásibine tóselgenderdi jumysqa attaı qalap alatyndaryna mysaldar keltirdi. J.Qızatov atyndaǵy Esil aýylsharýashylyq kolledjinde zamanaýı qural-jabdyqtar ornatylǵan veterınarlyq klınıka jumys isteıdi. Birqatar seriktestikterdiń ótinishimen et, sút ónimderi óndirisiniń mamandary daıarlanady. Osylaısha jas mamandardyń eńbek naryǵynan óz ornyn qınalmaı tabýyna, jumysqa ornalasýyna múmkindikter barynsha qarastyrylǵan. «Munaımash», «Petropavl aýyr mashına jasaý» zaýyty aksıonerlik qoǵamdarynda dýaldy oqytý júıesi jaqsy jolǵa qoıylǵan. «SevKazEnergo» kompanııasy kásiptik daıarlaý jáne servıs kolledji bazasy negizinde elektrmen jabdyqtaý páni boıynsha oqytý polıgonyn ashqan. Basqosýda Petropavl qurylys-ekonomıkalyq kolledjiniń tájirıbesi úlgi etildi. Munda 11 seh pen arnaıy oqytý sheberhanalary qurylǵan. «Nátıjeli jumyspen qamtý jáne jappaı kásipkerlikti damytý» baǵdarlamasy sheńberinde elektrshi, gazben dánekerleýshi, slesar, aspaz, esepshi mamandyqtary daıarlanady. Degenmen de, memleket talabyna ortaq úles qosýdyń ornyna qulyqsyzdyq tanytyp jatatyn jumys berýshiler de joq emes. Sonyń saldarynan alǵan mamandyǵy boıynsha qyzmet tappaı basqa salaǵa amalsyz aýysatyn jaǵdaılar az ushyraspaıdy. Ozyq tehnologııalardy engizý, sıfrlandyrý áli ózekti másele retinde qalyp otyr.
Kolledj dırektorlary Anatolıı Fýrmanıýk, Nıkolaı Sokolov, taǵy basqalar óz kásibin tereń ıgergen mamandar ázirleý eki deńgeıli júıede júrgiziletinin, stýdentterge tálimgerler men áleýmettik seriktestikter bekitilgenin, Úkimet tarapynan barlyq áleýmettik jaǵdaı qarastyrylǵanyn jetkizdi. Kelesi oqý jylynan bastap IT-mamandaryna memlekettik tapsyrys mólsheri ulǵaıyp, eki jarym myńdaı jas tegin oqýǵa qabyldanady. Munyń ózi shalǵaıdaǵy eldi mekender úshin ozyq bilim men quzyrettilikke qol jetkizýge aıqara jol ashady. «Prezıdenttiń bes áleýmettik bastamasy» úlken suranysqa ıe jańa mamandar daıarlaýǵa zor serpilis berip otyr. «Tehnık-mehatronık», «Kompıýterlik jabdyqtardy jóndeý jáne qyzmet kórsetý», «Aqparatty qorǵaý» sekildi jańa mamandyqtar paıda bolady. «WoridSkiills» jobasy boıynsha oqytylady. О́kinishke qaraı bázbir mekemelerdiń kelisimsharttary qaǵaz júzinen árige aspaı jatady. О́ndiristik tájirıbege kelgen bolashaq mamandarǵa jalaqy tóleý múmkindikteri bola tura, durys yntalandyrylmaıdy. Bir mezgil bolsa da ystyq tamaq uıymdastyrylmaıdy. Aldaǵy kezeńde osy olqylyqtardyń túzetilgeni abzal, desti oqý oryndarynyń basshylary.
Jıynda kásiptik-tehnıkalyq bilim berý baǵdarlamalaryn talapqa saı júrgizýdiń, áleýmettik jaýapkershilikti arttyrýdyń ózge de jaıttary atap kórsetildi.
О́mir ESQALI,
«Egemen Qazaqstan»
Soltústik Qazaqstan oblysy
