«Nur Otan» partııasy júzege asyryp jatqan «Balalar úshin tegin IT-kabınetter» jobasy aıasynda Aqtóbe qalasyndaǵy №56 orta mektepte kezekti IT-kabınet ashyldy. Sıfrlyq kabınettiń jumysymen oblys ákimi Berdibek Saparbaev tanysyp shyqty.
- El Prezıdentiniń Aqtóbe qalasyndaǵy mektepterdi kompıýterlermen jáne ınternetpen qamtamasyz etý tapsyrmasy tolyqtaı oryndaldy. Keıbir aýyldyq jáne qala syrtyndaǵy mektepterde ınternet jyldamdyǵy tómen. Biraq bul suraq jańa oqý jyly bastalǵanǵa deıin kóp jerlerde sheshiletin bolady. «Sıfrlyq Qazaqstan» baǵdarlamasynyń arqasynda óńirde kóptegen jobalar júzege asyrylýda. Eń aldymen olar halyqqa kórsetiletin qyzmetter sapasyn kóterýge baǵyttalǵan,-dedi óńir basshysy.
Ol 2018 jyly «Baqytty bala» aýqymdy jobasynyń júzege asyrylyp jatqanyn atap ótti. Joba baǵyttarynyń biri - oblystyń bilim berý mekemelerin ınteraktıvti jabdyqtarmen jaraqtandyrýdy kózdep otyrǵan «Balalardyń IT álemi».
- Atap aıtqanda, Aqtóbe men barlyq aýdandarda robot tehnıkasy ortalyqtaryn ashýǵa qarajat bólingen. Bastysy – balalardyń joǵary ıntellektýaldy tehnologııalarǵa degen qyzyǵýshylyǵyn oıatý. Bul jaǵdaıda Prezıdent tapsyrmasyn sapaly oryndaımyz,- dep atap ótti Berdibek Saparbaev.
Aıta keteıik, oqýshylar IT-klastarda jazǵy ýaqytta da oqı alady. Balalar bilikti pedagogterdiń jetekshiligimen 3D-úlgileý, arhıtektýra, dızaın, anımasııa baǵdarlamalaryn, baǵdarlamalaý men web-saıttardy qurýdy ıgeredi. IT-klastyń barlyq bilim berý baǵdarlamalary halyqaralyq standarttarǵa saı.
Aqtóbe oblysynda «Nur Otan» partııasynyń jobasy aıasynda bıyl 20 IT-klass ashylmaq. Olardyń segizi qalalyq, 12-si aýyldyq mektepterde. Alǵashqy úsh IT-klass Aqtóbedegi №9, №21 jáne №55 mektepterde ashyldy. Jobanyń maqsaty – memleket basshysynyń tapsyrmasy men «Sıfrlyq Qazaqstan» baǵdarlamasy aıasynda jas qazaqstandyqtardyń ǵylymı-shyǵarmashylyq jáne zertteý daǵdylaryn arttyrý.
Temir Qusaıyn,
«Egemen Qazaqstan»
