"Sot júıesin qoǵam synap jatsa, sýdıalardyń jumysy sapasyz dep bizge syn aıtsa, kóbinese moıyndamaımyz, kelispeımiz, ózimizdi aqtaı bastaımyz. Sottyń, sýdıalardyń jumysy óte sapaly, sebebi sotqa qatysýshylardyń 5% ǵana aryzdandy dep statıstıkadan derekter keltiremiz. Sonda 95% jaǵdaıda sottalǵandar nemese jábirlenýshiler, prokýrorlar, azamattar joǵary satyǵa júginbedi, sot uıǵarymymen kelisedi, joǵary satylarda ózgertiletin, buzylatyn sot aktileriniń sany 1 prosentke de jetpeıdi (0,7%) deımiz. Árıne, osy sıfrlardy keltirip, sot jumysy jaıly oń pikir qalyptasyrýǵa bolady. Biraq, osy statıstıkany jiktep qarar bolsaq, múldem basqa kartına kórer edik", - dedi Jaqyp Asanov.
Onyń aıtýynsha, qylmystyq, azamattyq, ákimshilik isterdi bólip qarastyrý arqyly shynaıy statıstıkany kórýge bolady.
"Istiń de ár túri bar. Daýly ister bar, daýsyz ister bar. Olardyń birqatary mámilemen aıaqtalady. Al buıryq óndirisinde tipti páteraqy qaryzy, turǵyn-úı kommýnaldyq máseleler jóninde sheshim shyǵarylady. Bul jóninde eshkim joǵary satyǵa shaǵymdanbaıdy. Shyn máninde, qylmystyq ister boıynsha shyǵarylǵan úkimderdiń 30% shaǵym túsken, demek árbir úshinshi úkimge halyqtyń kóńili tolmaǵan. Azamattyq isterdiń 20%-ine shaǵym túsken, joǵaryda aıtylǵandaı 5% emes", - dedi ol.
Asanovtyń aıtýynsha, 2017 jyly Qazaqstanda qylmystyq jáne azamattyq ister boıynsha úkimder men sheshimderdiń 20,4 prosentine shaǵym túsken. Damyǵan elderde bul kórsetkish 1%, 7%, 6%-ti ǵana quraıdy.
"Osylaısha, daýly isterge daýsyz isterdiń sanyn qosyp, jumysymyzdy jyltyratyp otyrmyz. Biraq, "Aýrýyn jasyrǵan óledi" degendeı, muny qoǵamǵa ashyq aıtýymyz kerek. Sonda ǵana máseleni erterek qolǵa alyp, jaǵdaıdy jaqsarta alamyz", - dedi J.Asanov.
