Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl Agenttigi Batys Qazaqstan oblysy boıynsha Departamentiniń bastamasymen oblystyq sotta «Penıtensııarlyq mekemelerdegi sybaılas jemqorlyqqa qarsy mekemeleriniń zamanaýı tehnologııalary, tetikteri men resýrstary» taqyrybynda ǵylymı-praktıkalyq konferensııa ótti.
Konferensııaǵa Departament qyzmetkerleri, oblys sýdıalary, Qylmystyq atqarý júıesi departamenti ókilderi, arnaıy aımaqtyq monıtorıngtik top músheleri, «Adam quqyǵy jáne zańdylyq saqtalý boıynsha Bıýrosy» qoǵamdyq uıymy oblystyq fılıalynyń basshylyǵy jáne baspasóz ókilderi qatysty.
- Memleket basshysy aldymyzǵa qoıǵan basty mindettiń biri – sybaılas jemqorlyqpen kúres jáne Zań ústemdigi. Elimizde aldyn alý, bilim berý-tárbıeleý jáne jazalaý sharalarynan quralǵan sybaılas jemqorlyqpen kúrestiń jańa órnegi jasaqtaldy. Adam ómiri úshin mańyzdy máselelerge qatysty zańnamalyq aktilerge tolyq tekserý júrgizýge nazar aýdaryldy, sybaılas jemqorlyqtyń sebepteri men jaǵdaılaryn joıýǵa baǵyttalǵan jańa zańdar qabyldandy. Sybaılas jemqorlyqtyń aldyn alýshy mekemeler jemqorlyq qaýpin taldap, monıtorıng júrgizýde. Naqty organdarda jemqorlyqty joıý boıynsha usynbalar daıyndalýda. Sybaılas jemqorlyqpen kúres strategııasyn júzege asyrý aıasynda bundaı monıtorıng jazasyn ótep jatqan sottalýshylardyń quqyǵyn qorǵaý boıynsha halyqaralyq mindettemelerdiń oryndalý barysyn anyqtaý úshin oblystyń qylmystyq-atqarý júıesine júrgizildi. Tekserý nátıjesinde anyqtalǵan jáıtter boıynsha tıisti usynbalar jasaldy, - deıdi Memlekettik qyzmet isteri jáne sybaılas jemqorlyqqa qarsy is-qımyl Agenttigi Batys Qazaqstan oblysy boıynsha Departamentiniń basshysy, Ádep jónindegi keńes tóraǵasy Bolat Isaqov.
Batys Qazaqstan oblystyq sotynyń tóraǵasy Bek Ámetov sot júıesinde sybaılas jemqorlyqqa qarsy mádenıet qalyptasqany týraly málimdedi. Sot júıesinde jemqorlyqqa qarsy baǵdarlamany oryndaý maqsatynda jemqorlyqtyń aldyn alý boıynsha keshendi jospar jasaqtalǵan. Jospar mindeti – jemqorlyqpen kúreske sýdıalar men mamandardy tartý, sot júıesindegi jemqorlyqqa múldem tózbeıtin qoǵam qalyptastyrý. Jemqorlyq faktoryn joıý úshin sot qyzmetinde azamattardyń aryzdary men usynystaryna sergek qaraý, shaǵymdarǵa ýaqytyly shara alý, sýdıalyq korpýs jáne sot qyzmetkerleri tarapynan jasalǵan quqyq buzýshylyqtar týraly senim telefonyna habarlaý óte mańyzdy.
Konferensııada sóz alǵan Oral qalalyq sotynyń sýdıasy Rýslan Jumaǵulov qylmystyq ister men materıaldardy beınekonferensbaılanys arqyly qarap, sottalýshylar men tulǵalardy túrmede jáne tergeý ızolıatorlaryna aýystyrmaı qaraıtyn «Qashyqtyq sot prosesi» týraly aıtyp berdi. Bul tehnologııa ýaqyt pen bıýdjet qarajatyn, sondaı-aq jalpy qaýipsizdik rejımin saqtaýǵa múmkindik beredi. 2018 jyldyń basynan bastap, sot qylmystyq atqarý júıesiniń úsh mekemesi boıynsha 169 uıǵarymdy beınekonferensbaılanys arqyly qarady. Azamattarǵa qyzmet kórsetýde IT-tehnologııany paıdalaný qarym-qatynasty ashyq etip, sot tóreligin tıimdi júzege asyrýǵa kómektesedi.
О́z salasyndaǵy sybaılas jemqorlyqqa qarsy júrgizilip jatqan is-sharalar týraly oblystyń Qylmystyq atqarý júıesi Departamentiniń basshysy Dmıtrıı Kobsev baıandady. «Adam quqyqtary jáne zańdylyqty saqtaý bıýrosy» qoǵamdyq birlestigi oblystyq fılıalynyń dırektory Pavel Kochetkov bas bostandyǵynan aıyrý oryndarynda sottalǵandardyń zańdy quqyqtaryn saqtaý týraly baıandama jasady.
Konferensııaǵa qatysýshylar atap ótkendeı, tıimdi memlekettik apparat qurýda memlekettik qyzmetshilerdiń ádebi mańyzdy ról atqarady. Sondyqtan, memlekettik organdarda memlekettik qyzmetshilerdiń etıkalyq kodeksi men memlekettik qyzmet týraly zańyn saqtaý, sybaılas jemqorlyqqa qarsy birlese kúresý maqsatynda Batys Qazaqstan oblystyq sotynyń tóraǵasy B.Ámetov pen Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy agenttiginiń BQO boıynsha departamenti basshysy B.Isaqov yntymaqtastyq týraly memorandýmǵa qol qoıdy.
Bul memorandým memlekettik organdar men uıymdardyń, kvazımemlekettik sektor sýbektileriniń qyzmetinde jáne memlekettik basqarý máselesinde korrýpsııanyń aldyn alýǵa, onyń paıda bolý sebepterin azaıtýǵa negiz bolady deıdi konferensııany uıymdastyrýshylar.
Qazbek QUTTYMURATULY
«Egemen Qazaqstan»
Batys Qazaqstan oblysy
