Jıyndy aýdan ákimi Jarqynbek Baısabyrov ashyp, qazaqtyń salt-dástúrleri osylaı keremet nasıhattalyp jatqanyna erekshe rızashylyǵyn bildirdi. Saıystyń bas uıymdastyrýshy Shyǵys Qazaqstan oblystyq Jastar resýrstyq Ortalyǵynyń dırektory Araılym Esimbekova qatysýshylarǵa qoıylatyn talaptardy túsindirip, ádil-qazylar alqasynyń múshelerimen tanystyrdy.
Oblystyq baıqaýdyń birinshi bólimi «As adamnyń arqaýy» dep atalǵandyqtan, kelinderimizge arnap dalada qos aqshańqan kıiz úı tigildi. Aýlada qazan oshaq pen 13 samaýryn tizilip qoıyldy. Qos kıiz úıdiń birinde kelinder úıden pisirip ákelgen qazaqtyń ulttyq taǵamdarynan dastarhan ázirlendi. Bunyń baǵasyn ádilqazylar anyqtap jatty. Ekinshi kıiz úıde ystyq baýyrsaq pisirip, ónerlerin kórsetý úshin kelinder iske kiristi. Samaýrynnan qazaqsha sút qosqan sháı demdep, quıyp berý de, ony izetpen usyný da kelinderdiń moınyna túsken bir syn boldy. Baýyrsaqty pisirýden alǵashqy bop, Zaısan aýdanynan kelgen Aınur Kakeeva alǵa ozyp shyqty. Budan soń ár kelin óz qoldarynan shyqqan ulttyq taǵamdardy tanystyrdy.
Ár eldiń salty basqa demekshi, kelinder barlyǵy bir oblystan bolsa da, tipti aýdandardyń ishinde umytylyp bara jatqan ásip, bylamyq, jonqýyrdaq sııaqty kóptegen ulttyq taǵamdardy keremet daıyndaıtyndyǵymen tańdaı qaqtyrdy,-dedi ShQO máslıhaty depýtatynyń qoǵamdyq qabyldaý bóliminiń jetekshisi Bulbul Bakınova,-sonymen birge, qospa, balqaımaq, tary, qurt, irimshik sút ónimderi de árbir dastarhanda molynan turdy.
Budan soń saıys Mádenıet úıiniń konsert zalynda ótti. Bul bólimde kelinder boıyndaǵy aqyl oı, parasattylyǵyn dáleldep kórsetti. Sonymen «Oblystyq Jas kelin-2018» baıqaýy máresine jetip, barlyq qatysýshy kelinge Abaı aýdanynyń ákiminiń jeke ataýly syılyǵy tabystaldy. Qosymsha elektrli et tartqysh mashınasy syıǵa tartyldy. «Semeı mebel» kompanııasynyń dırektory, jeke kásipker Anarhan Temirbolatqyzy Ulandyq Rabıǵa Serjanqyzyna úı jıhazynyń sertıfıkatyn tabys etti. Arnaıy dıplommen Kýrchatov qalasynan kelgen kelin Aıdana Jumaǵulova marapattaldy. Úshinshi oryndy Abaı aýdanynan Aıjan Úrkimbaeva ıelendi, oǵan 50 myń teńge syılyǵy tabys etildi. Ekinshi oryn О́skemen qalasynan kelgen Áıgerim Bekqyzyna buıyrdy. Al Bas júlde «Aıaýly jas kelin - 2018» ataǵyn Zaısan aýdanyna Aınur Kakeeva jeńip alyp, 100 000 teńge qarjylaı marapatqa ıe boldy.
Raýshan NUǴMANBEKOVA
sýretter avtordyki.
Abaı aýdany, Shyǵys Qazaqstan oblysy.
