Beınejazbada qart áje Memleket basshysyna bata berip, elge oralýyna qoldaý kórsetken Qazaqstannyń Syrtqy ister mınıstrligi jáne Qytaıdaǵy elshilik qyzmetkerlerine alǵys aıtady. Onyń uly da sheshesiniń sózine qosyla otyryp elimizdiń dıplomatııalyq qyzmetine rızashylyǵyn bildiredi.
«2018 jyly 2 maýsymda Qazaqstannyń Qytaıdaǵy Elshiligi men Qytaı Qoǵamdyq qaýipsizdik mınıstrligi arasyndaǵy ýaǵdalastyqtardyń arqasynda Qytaı Halyq Respýblıkasynyń Shyńjań-Uıǵyr avtonomııalyq ólkesinde dúnıege kelgen 90 jastaǵy ulty qazaq áje Qazaqstanǵa qaıta oraldy», dep jazdy Ánýar Jaınaqov.
2018 jyly 29 mamyrda Beıjińde kóshi-qon zańnamasyn buzǵany jáne QHR aýmaǵynda zańsyz bolǵany úshin qart áıel jáne onyń uly ustalǵan bolatyn. Keıinnen anyqtalǵandaı, ol jáne onyń otbasy Qytaıǵa 2017 jyly naýryzda kelip, vızada belgilengen merzimdi (30 kún) saqtamaı, bir jyldan astam el aýmaǵynda bolǵan.
Elshiliktiń qyzmetkerleri Qytaı quqyq qorǵaý organdarymen dereý habarlasty. Qazaqstandyqtardy ustaý sebepteri anyqtalǵannan keıin olardyń Qazaqstan men Qytaı elderiniń qos azamattyǵy bolǵany belgili boldy.
Qytaılyq tarap pen Qazaqstan Elshiliginiń kómegi arqasynda ustalǵandardyń Qytaı azamattyǵynan aıyrylý týraly qujatty jáne olardy aıyppulsyz ári ýaqytsha ustaý ızolıatoryna qamaýsyz Qazaqstanǵa deportasııalaý tez arada resimdeldi.
