Memorandýmnyń basty maqsaty birlesip jumys isteýge bekingen taraptar partııanyń «Balalarǵa arnalǵan tegin IT synyptary» atty jańa jobasyn júzege asyrý, «Sıfrly Qazaqstan» baǵdarlamasyn júzege asyrýda buqara halyqtyń sıfrly saýattylyǵyn arttyrý, sondaı aq «Kásibı mamandardy daıyndaıtyn IT ortalyqtar» partııalyq jobasyn júzege asyrý bolyp tabylady.
Partııanyń oblystyq fılıaly tóraǵasynyń birinshi orynbasary Ǵalym Bekmaǵambetov memorandýmǵa qol qoıý sharasynda «Nur Otan» partııasynyń jańa jobalaryn júzege asyrý barysynda Aqmola oblysynda eki IT ortalyq pen 28 IT synyp ashylady dedi. «Álemdik tájirıbege súıensek IT mamandary 4-5 jyl arnaıy bilim almaı-aq tegin kýrstardy aıaqtap, óz salasynyń bilikti mamany atanyp júr. Sondyqtan IT tehnologııa men robot-tehnıka – jarqyn bolashaqtyń kepili. Sondyqtan jastardyń osy salada jan-jaqty bilim alýynyń mańyzy zor. Partııa bul baǵytta tıisti qoldaý kórsetedi. Búginde oblys aldyńǵylardyń biri bolyp IT synyptary men IT ortalyqtaryn ashýdy bastap ketti», dedi ol.
Saltanatty sharada «Nur Otan» partııasy oblystyq fılıaly men oblystyq bilim basqarmasy, oblystyq kásipkerler palatasy, oblystyq mádenıet basqarmasy men A.Myrzahmetov atyndaǵy Kókshetaý ýnıversıteti arasynda memorandýmǵa qol qoıyldy.
Oblysta búginde Málik Ǵabdýllın atyndaǵy №3 mektep-gımnazııasynyń bazasynda IT synyby ashylyp, jumys isteýde. Bul jerde oqýshylar robot-tehnıka, 3D modeldeý baǵdarlamalaryn úırenýde. Sonymen qatar IT mamandaryn A.Myrzahmetov atyndaǵy Kókshetaý ýnıversıtetiniń qabyrǵasynda daıyndaıtyn bolady. Jýyrda ýnıversıtet qabyrǵasynda baǵdarlamalaýdyń zamanaýı tilin úıretetin alǵashqy IT ortalyq ashyldy.
«Egemen-aqparat»
