19 márte jalaýy jelbiregen dástúrli jarysqa bıyl Qytaı, Qyrǵyzstan, Túrkııa jáne Qazaqstannyń birqatar aımaǵynan kelgen bylǵary qolǵap sheberleri qatysty. Sharshy alańǵa kóterilgen órender arasynan 25 jastaǵy Bekbolat Quramysovtyń óneri kórermender kóńilinen shyqty. 2016 jyly stýdentter arasyndaǵy Azııa birinshiliginiń qola jáne álem chempıonatynyń kúmis júldegeri atanǵan Atyraý oblysynyń týmasy birden qyraǵy mamandar nazaryna ilikken bolatyn. Byltyr Shymkentte ótken Qazaqstan chempıonatynda ol úshinshi orynǵa taban tiredi. Sol kezden bastap Quramysov Dúnıejúzilik boks serııasy dodasynda «Astana arlandary» sapynda óner kórsetýde. Bul jarysta da Bekbolat ózin jaqsy qyrynan kórsetip, jarys jeńimpazy atandy. Alǵashqy úsh básekede óz qarsylastaryn ońaı eńsergen Qazaqstan Respýblıkasyna eńbek sińirgen jattyqtyrýshy Dastan Sádýaqasovtyń tól shákirti fınalda shymkenttik Ábihalyq Muhammedti ekinshi raýndta aıqyn basymdyqpen utty.
О́zge salmaq dárejelerinde myna boksshylar jeńis tuǵyrynyń eń bıik satysyna kóterildi: 49 keli – Temirlan Zaǵıev (Qaraǵandy), 52 keli – Qýanysh Dúısenbaı (Mańǵystaý), 56 keli – Jandos Sheraly (Almaty qalasy), 60 keli – Mıras Ertanov (Qazaqtyń Sport jáne týrızm akademııasy), 64 keli – Sultan Sharshov (Mańǵystaý), 75 keli – Arman Nurıslamov (Mańǵystaý), 81 keli – Nurjan Jaqan (Qazaqtyń Sport jáne týrızm akademııasy), 91 keli – Dinıslam Ábdeshov (Ońtústik Qazaqstan) jáne +91 keli – Ábilqaıyr Turlanbekov (Jambyl).
Halyq qaharmany Qaırat Rysqulbekovti eske túsirýge arnalǵan týrnırde erekshe kózge túsken boksshylar Qazaqstannyń stýdentter qurama komandasy sapyna qabyldanady. Al bizdiń órender úshin bıylǵy jyldyń basty jarysy – ústimizdegi jyldyń qyrkúıek aıynda Reseıdiń Elısta qalasynda jalaýy jelbireıtin álem birinshiligi. Esterińizde bolsa, osydan eki jyl buryn Taılandta uıymdastyrylǵan stýdentterdiń dúnıejúzilik dodasyna bizdiń elden 8 sportshy attanyp, sonyń altaýy elge oljaly oraldy. Atap aıtsaq, Dıdar О́telbaev (60 keli), Álı Ahmedov (81 keli) jáne Nursultan Amanjolov (+91 keli) bas júldeni oljalasa, Bekbolat Quramysov (69 keli) kúmis medaldi ıelendi. Al Ertýǵan Zeınýllınov (56 keli) pen Rahat Marjyqbaev (75 keli) qolaǵa qol sozdy. Bul – óte jaqsy kórsetkish. Endi Elıstada ótetin jarysta da Qazaq eliniń órenderi óz jankúıerlerin jerge qaratpaıdy degen oıdamyz, – deıdi Qazaqstannyń stýdentter quramasynyń aǵa jattyqtyrýshysy Dastan Sádýaqasov.
Ǵalym SÚLEIMEN,
«Egemen Qazaqstan»
