Ink taıpasynyń tarlandary

Sáttilik serik bolǵan

Jalpy alǵanda Perý Álem chempıonatyna barady degenge eshkim sengen joq. Biraq bastapqy oıyndarda jeńilse de, tabandylyǵynyń arqasynda degenine jetti. Oıynnyń sońǵy mınýttarynda sáttilik serik bolyp, perýlikter talaı oıyndy qutqaryp qaldy. Argentınamen teń túsip, Messı bastaǵan sa­ıyp­qyrandardy tyǵyryqqa da tiredi. Bolıvııadan 2:0 je­ńilgen oıynda Perýge 3 upaı bu­ıyrdy. Nege deısizder ǵoı? Bolıvııa quramasy alańǵa oınaýǵa ruqsaty joq fýtbolshyny shyǵarypty. Minekeı, osyndaı qıly jaǵdaılarmen Perý Chılı quramasyna bá­sekeles atandy. Sońǵy match­tardy Chılı onsyz da jaǵdaıy qıyn Argentınamen kezdesip, upaı joǵaltty. Jergilikti jankúıerler bul oqıǵalardy qudaıdyń bergen násibi dep túsindi. Al mańyzdy goldyń avtory Hose Gerrero qazir Perýde ult qaharmany. Ke­zinde «Bavarııa» sapynda óner kórsetken shabýylshy Perý quramasynda het-trık jasaýymen erekshelenedi. О́tken jyly Amerıka kýbogynda da bir matchta úsh gol soǵyp daralanǵan. 

Jemqorlyq indeti dendedi

Perý quramasy 1970-1982 jyldar aralyǵynda úsh ret qatarynan Álem chempıonatyna bardy. Qur bara salmaı, aýyz toltyryp aıtarlyqtaı nátıje kórsetti. Mine, sol 1982 jyldan keıin Perý tek osy joly ǵana irikteýden óte aldy. Araǵa 36 jyl salyp qaıta oralǵan Perý eldegi fýtboldy damytýdyń jańa bastamasyn kótermek. Se­bebi 2008 jyldan beri Pe­rý­degi fýtbolǵa jemqorlyq at­ty kesapat jabysqan edi. Tipti FIFA Perý quramasyn kóptegen halyqaralyq jarystarǵa qa­tystyrmaı da tastady. En­di, mine sońǵy jyldardyń bederinde jaǵdaı jaqsaryp, talantty oıynshylar kórine bastady. Perýdiń kóptegen fýtbolshylary Eýropa asyp, ózge birinshilikterde dop teýip júr. Sodan beri tek 2011 jyly ǵana bul eldiń quramasy júldege qol jetkizdi. Amerıka kýbogyn­da qola júlde ıelengen perýlikter qurlyqtyq dodadaǵy je­tistikke qatty masattanyp ketti. Artynsha ǵana bastalǵan Brazılııa mýndıaliniń irikteýinen óte almady. 

Gerrero men Farfanǵa senim artady

Perý quramasy chempıo­nat­taǵy oıynyn 16 maýsym kúni bastaıdy. Alǵashqy qarsylas – Danııa. Skandınavııa túbeginiń ókili Krıstıan Erıksen bas­taǵan saıypqyrandarǵa se­nip otyr. Al Perý bapkeri Rı­kar­do Gareka bul matchta kem degende 1 upaı alýymyz kerek dep topshylaıdy. Reseı chem­­pıo­ny atanǵan Djeferson Far­fany bar Perý Fransııadan jeńil­sek te, Aýstralııanyń ap­shy­syn qýyramyz degendi aıtady. Oılary Fransııadan keıingi ekinshi oryndy ıemdenip, pleı-offqa shyǵý. Perý 21 maýsym kúni Fransııamen, 26 maýsym kúni Aýstralııamen kezdesedi. 

Perý quramasynyń oıynshylar tizimi:

• qaqpashylar: Karlos Kase­da («Ýnıversıtarıo»), Hose Kar­valo («Kahamarka»), Pedro Galese («Verakrýs»);

• qorǵaýshylar: Lýıs Advın­kýla («Lobos BÝAP», Mek­sıka), Mıgel Araýho («Alıan­sa Lıma»), Aldo Korso («Ýnıversıtarıo»), Krıstıan Ramos («Verakrýs»), Alberto Rodrıges («Atletıko Hýnıor», Kolým­bııa), Mıgel Traýko («Fla­mengo», Brazılııa), Nıl­son Loıola («Melgar»), Ander­son Santamarııa («Pýebla», Meksıka);

• jartylaı qorǵaýshylar: Edıson Flores («Olborg», Danııa), Pedro Akıno («Lobos BÝAP»), Vılder Kartahena («Verakrýs»), Krıstıan Kýeva («San-Paýlý», Brazılııa), Paolo Ýrtado («Vıtorııa», Portýgalııa), Renato Tapıa («Feıenord», Nıderlandy), Iosımar Iotýn («Orlando Sıtı», AQSh);

• shabýylshylar: Djef­ferson Farfan («Lokomotıv», Reseı), Raýl Rýıdıas («Mo­relııa», Mek­sıka), Andre Karrılo («Ýotford», Anglııa), Paolo Gerrero («Flamengo», Brazılııa), Endı Polo («Portlend Tımberz», AQSh).

Ermuhamed MÁÝLEN, 

«Egemen Qazaqstan»