Praktıkter Alıansy «teń teńimen» qaǵıdatyna saı Ekonomıkalyq yntymaqtastyq jáne damý uıymy (EYDU) ádisimen qurylyp, aımaqtyń jeti eli arasynda yntymaqtastyqty arttyrý jáne memlekettik qyzmet kórsetýdi sıfrlandyrý boıynsha tájirıbe almasýǵa negizdelgen.
EYDU memlekettik basqarý boıynsha dırektorat taldaýshysy Joao Rıkardo Vaskonselos óz sózinde: «Teń teńimen» qaǵıdaty boıynsha oqytý áleýmettik-ekonomıkalyq jaǵdaılary uqsas elder arasynda turaqty túrde tájirıbe almasýdy bildiredi. Alıans memleketti sıfrlandyrý maqsatynda ortaq sheshimder men ıdeıalar izdeýge jol ashady. EYDU osy maqsattarǵa jetýge árkez qoldaý kórsetýge ázir», - dedi.
Estonııanyń elektrondy úkimet akademııasynyń Keńesi múshesi Krıstın Leıtner «Alıans aýqymynda qatysýshy elder ókilderine qazir memlekettik qyzmettiń 99 paıyzy onlaın rejıminde kórsetiletin Estonııanyń ýákiletti organdaryna tanystyrý sapary uıymdastyrylatynyn» aıtty.
«Zerde» holdıngi basqarma tóraǵasy orynbasary Janat Jahmetova Qazaqstannyń sıfrly memleketti damytýda eleýli nátıjege jetkendigin aıta otyryp, praktıkter Alıansy elektrondy úkimetti damytýǵa tyń serpin beretinine úmit artatyndyǵyn jetkizdi.
Bul Alıansty qurý ıdeıasy 2017 jyly memlekettik basqarý salasy sarapshylaryna arnalǵan memlekettik qyzmetterdi sıfrlandyrý boıynsha halyqaralyq semınar kezinde kóterilgen. Bul - Astana haby qurǵan ekinshi Alıans. 2016 jyly Ázirbaıjan, Grýzııa jáne Qazaqstan memlekettik qyzmet kórsetý boıynsha Alıans qurylyp, onyń nátıjesinde úsh eldegi «bir tereze» qaǵıdaty boıynsha úsh zertteý jumysy jasalǵan bolatyn.
EYDU - Astana habynyń strategııalyq seriktesi ári quryltaıshylarynyń biri. Konferensııa barysynda: «Biz Habtyń memlekettik qyzmetti jetildirý salasynda tájirıbe men bilim almasý úshin kóp jaqty, moıyndalǵan tuǵyrnamaǵa aınalǵandyǵyn maqtan etemiz», - degen bolatyn EYDU memlekettik basqarý jónindegi dırektoratynyń basshysy Markos Bontýrı.
Habqa qazir 40 el qatysady, onyń arasynda EYDU, TMD, Ortalyq Azııa jáne ASEAN elderi bar.
