Kezdesý barysynda G.Ábdiqalyqova elimizdiń ishki saıasatyndaǵy mańyzdy baǵyttarǵa nazar aýdardy. Búginde Qazaqstan Prezıdenti N.Nazarbaevtyń tapsyrmasymen ekonomıkany, saıasatty jáne qoǵamdyq sanany jańǵyrtýdy kózdegen júıeli jumys júrgizilýde. Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýy iske asyrylyp jatyr. Maqsatymyz – jańa álemniń kóshbasshy elderiniń qataryna qosylý. Áleýmettik jaýapty memleket qurýǵa baǵyttalǵan «Prezıdenttiń bes áleýmettik bastamasy» jobasy oryndalýda.
Gúlshara Ábdiqalyqova keń aýqymdy baǵyttar boıynsha joǵary deńgeıdegi ózara senimge negizdelgen syndarly saıası dıalogtyń arqasynda ekijaqty qarym-qatynas nyǵaıyp, yntymaqtastyq strategııalyq mártebege ıe bolǵanyn aıtty.
– Túrikmenstan Qazaqstan úshin Ortalyq Azııadaǵy tek tatý kórshi men senimdi seriktes qana emes, baýyrlas memleket. Bizdiń elderdi ortaq mádenıet, shynaıy dostyq pen ózara is-qımyl baılanystyrady, – dedi Memlekettik hatshy.
Búginde Qazaqstan men Túrikmenstan túrli kópjaqty basqosýlar (BUU, TMD, IYU jáne t.b.) aıasynda yntymaqtasyp keledi. Parlamentaralyq jáne vedomstvoaralyq baılanystar nyǵaıýda. О́ńiraralyq baılanystardyń órisi keńeıýde. Ekonomıkalyq yntymaqtastyq jónindegi úkimetaralyq komıssııa jumysy jolǵa qoıylǵan.
– Araldy qorǵaý halyqaralyq qory (AQHQ) óńirlik ózara is-qımyldyń mańyzdy alańy bolyp qala beredi, – dedi Memlekettik hatshy.
Qazaqstan men Túrikmenstanda álemdik, sondaı-aq óńirlik derjavalar ıgerýge jáne jetkizýge múddeli bolyp otyrǵan kómirsýtek resýrstarynyń eleýli qory bar. Eki eldiń kólik-tranzıt áleýeti de orasan zor. Elderimiz arasyndaǵy taýar aınalymy 2017 jyly 99,3 mln.dollar boldy.
Kezdesý sońynda Memlekettik hatshy G.N.Ábdiqalyqova Túrikmenstannyń Qazaqstandaǵy Tótenshe jáne ókiletti elshisi T.B.Kómekovke ózara qarym-qatynasty tatý kórshilik pen strategııalyq seriktestik rýhynda odan ári ilgeriletý jolynda mol tabys tiledi.
