«Lýjnıkı» stadıonynda birinshiliktiń ashylý saltanaty dástúrli teatrlandyrylǵan kórinispen bastaldy. Sahnalyq qoıylymnan soń ortaǵa brıtanııalyq ánshi Robbı Ýılıams, opera ánshisi Aıda Garıfýllına, sonymen qatar kompozıtor Aleksandr Boldachev shyǵyp, óz ónerlerin ortaǵa saldy. Al chempıonattyń resmı dobyn reseılik telejúrgizýshi jáne osy birinshiliktiń elshisi Vıktorııa Lopyreva alyp shyqty. XXI álem chempıonatynyń alǵashqy soqqysyn álemge áıgili brazılııalyq shabýylshy Ronaldo men týrnırdiń talısmany Zabıvaka atty qasqyr jasady.
Munan soń alańǵa amerıkalyq akter, hıp-hop oryndaýshy Ýıll Smıt pen Nıkı Djem jáne albanııalyq Era Istrefı shyǵyp, chempıonattyń Live It Up dep atalatyn resmı ánuranyn oryndady.
Bıylǵy mýndıalǵa álemniń 32 quramasy men 736 fýtbolshy qatysýda. Oǵan qosa, ár stadıonǵa jınalatyn júz myńǵa jýyq jankúıer men álemniń túkpir-túkpirinen teleekran arqyly mıllıondaǵan kórermen endi bir aı boıy fýtbolmen tynystaıtyn bolady.
Chempıonattyń saltanatty ashylý rəsimi ótkizilgennen keıin jasyl alańǵa Reseı men Saýd Arabııasy quramalary shyqty. Match bastalmaı turyp Reseı Federasııasynyń prezıdenti Vladımır Pýtın men Halyqaralyq fýtbol federasııasynyń (FIFA) prezıdenti Djannı Infantıno sóz sóılep, 2018 jylǵy álem chempıonatynyń resmı túrde ashylǵanyn málimdedi.
Reseı jáne Saýd Arabııasy quramalarynyń arasyndaǵy oıyn 5:0 esebimen alań ıeleriniń paıdasyna sheshildi. Reseı quramasynyń jáne bıylǵy dop dodasynyń alǵashqy golyn jartylaı qorǵaýshy Iýrıı Gazınskıı soqty. Sonymen qatar matchtyń 23-mınýtynda reseılik fýtbolshy Alan Dzagoev jaraqat alyp, oıyndy merziminen buryn aıaqtaýǵa májbúr boldy. Dárigerlerdiń aıtýynsha, Dzagoev alańǵa endi úsh aptadan soń oralýy múmkin. Jaraqat alǵan fýtbolshynyń ornyna Ispanııanyń «Vılıarreal» komandasynda dop tebetin shabýylshy Denıs Cheryshev shyǵyp, 43-shi jáne 90+1-shi mınýttarda dýbl jasap, komandasyn alǵa shyǵardy.
Ekinshi taımnyń 71-mınýtynda Artem Dzıýba mergendigimen kózge tússe, 90+4-shi mınýtta Aleksandr Golovın matchtyń núktesin qoıdy. Osylaısha, álem birinshiliginiń alǵashqy oıynynda Reseı quramasy Saýd Arabııasynyń komandasyn iri eseppen jeńdi.
Osymen, 31 kúnge sozylatyn ala doptyń alamany da bastaldy. 2018 jylǵy álem chempıonaty 14 maýsym men 15 shilde aralyǵynda Reseı Federasııasynyń 11 qalasyndaǵy 12 stadıonda ótedi.
