Búginde 108 jastaǵy Jibek áje de sol bir zulmatty jyldardy kózimen kórip, kókiregimen túısingen jan. Ǵasyrdan da uzaq jasaǵan ájemizdiń ómiri urpaqqa úlgi. Ol kezinde Jambyl oblysynyń Shý aýdanyndaǵy Kalının ujymsharynda eńbek etti. Soǵys jyldary da tylda aıanbaı eńbek etip, talaı beınetti bastan keshti. Zamana zapyranyn kórip, búgingi shuǵylaly kúnge jetip otyrǵan Jibek áje taǵdyrdyń buıryǵymen úsh ul men qyzdy dúnıege ákelip, azamat etip tárbıeledi.
Búgindi tańda sonaý qıyn-qystaý kezeńder artta qalyp, elimiz egemendik alǵan sátke kýá bolyp otyrǵan ájeı zamannyń tynyshtyǵyna, qoǵamnyń turaqtylyǵyna shúkir etedi. «Tynyshtyq pen turaqtylyqtan asqan baılyq joq. Biz talaı qıyn kezeńderdi bastan keshirdik. Endi búginde elimizdiń basyna shýaqty kún týdy. Osy beıbit kúnniń qadirin bilińder, qaraqtarym», deıdi Jibek Turǵyntaeva.
«Qartyń – qazynań» deıdi halqymyz. Kóp jasap, kópti kórgen Jibek áje árdaıym jastarǵa bilim alyp, adam bolýdy, elge paıdasy tıetin azamat bolýdy ósıet etedi. Búginde ol Taraz qalasyndaǵy Toqtaǵul degen balasynyń qolynda turady eken. Tolqynaı atty nemere kelini ájeni baǵyp, alǵysyn alyp otyr. Adamnyń bul ómirdegi basty maqsaty, adamı tilegi urpaǵynyń jaqsylyǵyn kórý ǵoı. Bul turǵyda da Jibek áje baqytty jan. «Jas kúnimde beınet ber, qartaıǵanda zeınet ber» degen qazaqtyń tilegi osy da...
Hamıt ESAMAN,
«Egemen Qazaqstan»
Jambyl oblysy
