Keshe sársenbiniń sátti kúni oblys ortalyǵyndaǵy jekemenshik jáne memlekettik avtoparkterdi tolyqtyrǵan sý jańa syıymdylyǵy mol ekologııalyq avtobýstar Qostanaıdaǵy «Allıýr Kompanııalar Toby» AQ-tyń aýmaǵynda jasalǵan. Atap aıtqanda, qalalyq baǵyttarǵa jol tartqan 70 avtobýs pen balalarǵa arnalǵan shaǵyn avtobýstardy qurastyryp shyǵarý isindegi qazaqstandyq úlestiń kólemi tıisinshe 70 jáne 35 paıyzdy quraıdy.
Eýro-5 standartyndaǵy jolaýshylar tasymaldaıtyn jańa qalalyq kólikter nege ekologııalyq dep atalǵan? «QDB-Lızıng» AQ basqarmasynyń tóraǵasy Nurlan Baıbazarovtyń aıtýynsha, munyń mánisi ekologııalyq turǵydan taza bolýynda. Aýa men qorshaǵan ortaǵa zııandy zattar shyǵarmaýynda. Kógildir otynnyń metan dep atalatyn túrin paıdalaný arqyly qozǵalatyn avtobýstar ekonomııalyq turǵydan da tıimdi. Oblys ortalyǵyna qarjylyq lızıngttik tásilder boıynsha satyp alynǵan avtobýstardyń quny 2 mlrd 578 mıllıon teńgeni quraıdy. Qanatqaqty jobaǵa sáıkes oblys ortalyǵyndaǵy avtobýs parkteriniń quzyryna berilgen qoǵamdyq kólikterdiń quny qarjylyq lızıng baǵdarlamasyna sáıkes bes jylǵa jeti paıyzdyq ósimmen usynylǵan. Joǵaryda atalǵan lızıngttik tásilmen tólenetin qarjynyń otyz paıyzy óńirdegi «Tabys» kommýnaldyq kásiporny enshisine tıedi.
Eýro-5 standarty boıynsha tuńǵysh ret Aqtóbe oblysynyń mysalynda júzege asyp elimizdiń barlyq qalalarynyń avtobýs parkterine engiziletin ekologııalyq sıpattaǵy avtobýstardyń taǵy bir ereksheligi – múmkindigi shekteýli jandar úshinde meılinshe yńǵaıly bolýynda. Iаǵnı arnaıy tetik arqyly avtobýs toqtaǵan kezde jyljymaly pandýs tez túsiriledi de, bul tásil múgedekter men jasy ulǵaıǵan jandardyń avtobýs salonyna kirýi men shyǵýyn jeńildetedi. Jańa qoǵamdyq kólikterge tán taǵy bir artyqshylyqtar – adamdardyń qaýipsizdigi úshin barlyq tehnologııalyq tásilderdiń ornyqtyrylǵany.
Buǵan sıfrly tehnologııanyń keıbir elementteri, beınekameralar jáne dıspetcherlik ortalyqpen baılanys júıeleri kiredi.
Respýblıka qalalarynyń avtobýs parkterin túbegeıli jańǵyrtý jóninde uzaq merzimge jasalǵan baǵdarlama tuńǵysh ret Aqtóbe aımaǵynda júzege asýyna oraı ótkizilgen saltanatty rásimde Aqtóbe oblysynyń ákimi Berdibek Saparbaev bul ómirsheń jańalyq turǵyndardyń ómir súrý deńgeıin jaqsartý úshin jasalǵan irgeli qadam ekenin atap kórsetti. Oblys basshysynyń aıtýynsha, tek sońǵy bir jyldyń ishinde avtobýs parkterin jańǵyrtý úshin 120 jańa avtobýs satyp alynǵan.
Munyń bári turǵyndardyń ıgiligi úshin jasalǵany haq.Sondaı-aq osy rásim kezinde joǵaryda atalǵan «Allıýr Kompanııalar Toby» AQ-na qarasty «SaryarqaAvtoProm» JShS-niń dırektory Syrym Semeıbaev Aqtóbe oblysynyń ákimdigi jańa avtobýstardy qalalyq baǵyttarǵa engizý men tıisti qarjylyq lızıng baǵdarlamasy qujattarynyń jedel ázirleý isinde ilkimdilik pen ońtaılylyq tanyta bilgenin atap kórsetti.
Sonymen respýblıka qalalaryndaǵy avtobýs parkteriniń qyzmetin túbegeıli jańǵyrtý jóninde Úkimette uzaq merzimge arnalǵan joba Aqtóbeden bastaý aldy. Endeshe, iske sát demekpiz!
Temir Qusaıyn,
«Egemen Qazaqstan»
AQTО́BE
