Astananyń 20 jyldyq mereıtoıyna ár óńir óz úlesterin qosýda. Bul – elordanyń aıbyny men abyroıy eldik mereıge aınalǵandyǵynyń aıǵaǵy. Budan on jyl buryn da qolǵa alynǵan is dástúrli sıpat alyp, jıyrma jyldyqta jalǵasyn tapty.
Elimizdiń barlyq aımaqtarynda – oblys ortalyqtarynda ashylǵan «Dostyq» úıi kúni búginge deıin Astana qalasynda joq bolatyn. Bul olqylyqtyń ornyn mańǵystaýlyqtar toltyryp, Baýyrjan Momyshuly kóshesi boıynda turǵan kóne Neke saraıyn qaıta jańǵyrtyp, «Dostyq» úıi retinde usynbaq.
Úsh qabatty ǵımarat 4900 sharshy metr aýmaqqa ornalasqan. Kelýshiler úshin 60 kólik orny, qyzmetkerler úshin arnaıy 13 kólik orny jasaqtalyp, jan-jaǵy abattandyrylyp, kógaldandyryldy.
Ǵımarattyń birinshi qabatynda bı zaly, ashana, stýdııa ornalassa, ekinshi, úshinshi qabattarda akt zaly, kitaphana, kıim bólmesi, murajaı, konferens zal ornalasqan. «Dostyq-Qazaqstan» mekemesiniń tapsyrysymen, «MediArtGroup» JShS jobalaýymen «SK «AlataýInjStroı» JShS júzege asyrǵan qurylys-jóndeý jumystaryna 50-ge tarta adam jumyldy. «Dostyq» úıiniń jumystary qazir tolyq aıaqtalyp, Astana qalasynyń mereıtoıyna tapsyrylatyn saltanatty sátti kútýde.
– Astana mereıtoıy – elge ortaq mereke. Toı shashýsyz bolmaıtyny belgili. Elimizdiń árbir óńiriniń elordaǵa syı jasaýy – Astananyń ajaryn asyryp, qajettiligine qoldaý beretin jaqsy bastama. Budan on jyl buryn «Nur Astana» meshitin jóndep, jan-jaǵyn abattandyryp syıǵa tartqan Mańǵystaý oblysy bıyl «Dostyq» úıin salýdy qup kórdi. Bizdiń syıymyz astanalyqtarǵa unaıdy dep oılaımyz, deıdi Mańǵystaý oblystyq qurylys basqarmasy basshysynyń orynbasary Beısenǵalı Kenjalıev.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
