«Daýdyń basy Daırabaıdyń kók sıyry» demekshi, daýdyń basy Sherdan Shakırıdiń kók býtsıy bolyp tur. Shveısarııa ulttyq quramasynyń oıynshysy aıaq kıimine Kosovo memleketiniń kók jalaýyn jabystyryp shyǵypty. Al Albanııa men Serbııanyń Kosovo úshin áli de qyrǵı-qabaq ekeni anyq. 2008 jyly Kosovo táýelsizdik alyp, Serbııanyń bodandyǵynan bosady. Al Sherdan Shakırıdiń ákesi Kosovonyń táýelsizdigi úshin kúresip, Serbııa bıligi tarapynan ábden qysym kórgen. Tipti ákesi áli kúnge deıin qamaýda otyr. Serbter men albandardyń arasy áli kúnge deıin sýyq. Ol endi jasyl alańda da kórinis berdi.
2014 jyly Eýro dodasynyń irikteý matchynda Serbııa men Albanııa quramalary kezdesip, oıyn sońyna deıin aıaqtalmaı qaldy. Eki komandanyń jankúıerleri sózge kelip, arty tóbeleske ulasty. Trıbýnadan ushyp túsken Kosovonyń jalaýyn Serbııa aıaqdopshysy julyp alyp, alań jıegine tastaı saldy. Osy kezde trıbýnadaǵy kıkiljiń jasyl alańǵa da jetti. Tóreshi Martın Atkınson oıyndy toqtatyp, FIFA-ǵa shaǵym túsirdi. Keıinnen Albanııa quramasyna 3:0 esebimen tehnıkalyq jeńis jazyldy. Mine, sodan beri qos memlekettiń sportshylary halyqaralyq arenada kezdese qalsa, osyndaı oqys oqıǵalar tirkeledi.
Endi, bul qaqtyǵys kútpegen jerden boldy. Jasyl alańǵa shyqqan Serbııa men Shveısarııa arasyndaǵy oıynda mundaı saıası jaǵdaı shyǵady dep eshkim oılamady da. Alaıda Shveısarııa sapynda óner kórsetetin birneshe oıynshynyń ulty – alban. Sherdan Shakırı men Granıt Djakka Shveısarııa quramasynyń osy oıynda soqqan 2 golynyń avtorlary. Ekeýi de gol soǵysymen qoldaryn keýdelerine aıqastyryp qoıyp, Albanııanyń jalaýyndaǵy qyran qusty belgilep, «Biz azatpyz» degendi uǵyndyrdy.
Bul áreketti tilshiler ilip áketip, aqparattyq maıdanǵa saldy. Serbter albandardy, albandar serbterdi qaralap jazdy. Endi Reseıdegi fýtbol toıynyń abyroıyna nuqsan keltirgeni úshin FIFA eki memlekettiń oıynshylaryna eskertý jasaıdy. Al Sherdan Shakırı men Granıt Djakka mýndıaldan múlde qýylyp ketýi de múmkin.
Serbııa men Shveısarııa oıyny bastalysymen stadıonǵa jınalǵan serbııalyq fanattar Sherdan Shakırı men Granıt Djakkaǵa dop kelgende ysqyryp, shýlaı bastady. Bul jaǵdaıdan habary bar shveısarııalyq fanattar ne isterin bilmeı dal boldy. Al odan keıin Blerım Djemaılıge qarsy serbter oıyn tártibin buzǵanda Shveısarııa jankúıerleri de shet qala almady.
Shveısarııa quramasynyń kóptegen oıynshysy Serbııaǵa qabaǵy qatýly, ishterinde nazy bar keıipte júrgeni belgili edi. Valon Behramıdiń qolynda Kosovo jalaýy beınelengenin barsha qaýym burynnan biledi. Al Fabıan Sher men Harıs Seferovıchterdiń ata-analary Bosnııada týyp-ósken. Blerım Djemaılıdiń de Albanııaǵa tikeleı qatysy bar.
Mine, Shveısarııa memleketi kezinde Iýgoslavııadan qashyp ketken bosqyndarǵa pana bolǵan el ekeni osydan bilinedi. Endi bul oqıǵaǵa baılanysty FIFA jaqyn arada sheshim shyǵarady. Nátıjesi qalaı bolaryn kóre jatarmyz. Bálkim, Halyqaralyq fýtbol qaýymdastyǵy toıdyń sánin ketirmes úshin, eshkimge min taqpas. Onyń ústine gol soqqan Granıt Djakka da, Sherdan Shakırı de «bul áreketimiz tek bizge sengen otandastarymyzǵa kórsetilgen qurmet edi» dep birdeı aqtaldy.
Ermuhamed MÁÝLEN,
«Egemen Qazaqstan»
