Elimizdiń Memlekettik táýelsizdiginiń 20 jyldyǵy qarsańynda «Qazaq ensıklopedııasy» baspasynan Qazaqstan Respýblıkasy Prezıdenti Keńsesiniń bastyǵy, saıası ǵylymdar doktory, professor Mahmut Qasymbekov jetekshilik etken shyǵarmashylyq toptyń ázirleýimen «Júrekten jetken jyrlar», «Tulǵa týraly tolǵamdar» jáne «Razmyshlenııa o Lıdere» dep atalatyn úsh jańa kitap jaryqqa shyqty.
«Júrekten jetken jyrlar» jınaǵyna Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevqa arnalyp ár jyldary jazylǵan poezııa janryndaǵy shyǵarmalar engen jáne onda belgili qalam sheberlerinen bastap, áýesqoı ádebıetshilerge deıingi 150-den astam avtordyń týyndylary qamtylǵan.
«Tulǵa týraly tolǵamdar» men «Razmyshlenııa o Lıdere» jınaqtaryna Elbasymyz týraly elimizdiń basty merzimdi basylymdary betterinde ár kezderi qazaq jáne orys tilderinde jaryq kórgen tańdaýly maqalalar men suhbattar engizilgen. Jekelegen materıaldar Prezıdent Muraǵatynan alynyp, alǵash ret jarııalanyp otyr.
Atalǵan kitaptarda ártúrli jastaǵy, alýan ult pen san túrli mamandyq ókilderi jáne birqatar saıası kózqarastar men senim-nanym ıeleri ázirlegen qıly salany qamtıtyn maqalalarǵa oryn berilgen. Olardyń qatarynda jýrnalıster, ǵalymdar, pedagogtar, dárigerler, ádebıetshiler, artıster, sýretshiler, sáýletshiler, dıplomattar, saıasatkerler, kásipkerler, fermerler, memlekettik qyzmetshiler, partııalar men qoǵamdyq birlestikterdiń jetekshileri, soǵys jáne eńbek ardagerleri, oqýshy jastar ókilderi, ıaǵnı is júzinde bizdiń qoǵamymyzdyń áleýmettik qurylymynyń barlyq spektri bar. Bul pikirlerdiń qundylyǵy ony aıtqan adamdardyń osy oqıǵalardy óz kózderimen kórip, kóbine solardyń tikeleı qatysýshylary bolyp tabylatyndyǵynda der edik.
Tarıhı oqıǵalardy qalpyna keltirýde zamandastardyń óz aýzymen bergen, tipti qysqa ári atústi kýálikteriniń ózi keıde bitken is týraly táptishteı jasalǵan júıeleý men ılandyratyn baıandaýlarǵa qaraǵanda áldeqaıda úlken aqparattyq mańyzǵa ıe bolyp tabylatyndyǵy ǵylymǵa jaqsy belgili.
Kitaptyń mazmuny ilgerileý hronologııasy boıynsha – 1991 jyldyń sońynan búgingi kúnge deıin túzilgenin ári ár materıaldyń respýblıka damýynyń belgili bir kezeńinde qalyptasqan jaǵdaıdyń ózindik bir úndes «kesindisi» bolyp tabylatynyn aıta ketý kerek. Munyń ózi eldiń evolıýsııasyn dınamıkaly túrde baqylaýǵa ári onyń aldynda turǵan mindetterdiń mánin jáne ol mindetterdiń qandaı joldarmen, qandaı ádistermen sheshilip otyrǵanyn retrospektıvti túrde qaraýǵa múmkindik beredi. Oqyrman N.Á.Nazarbaevtyń saıası kóshbasshylyq tarıhynyń tórkinine osy arnada zer salýǵa jáne bedeldiń, búkilhalyqtyq senim men halyqaralyq tanylýdyń bir kúnde ǵana kele qoımaıtynyna, ol Otan ıgiligi úshin kún saıynǵy jáne qajyrly eńbektiń zańdy nátıjesi ekendigine kóptegen mysaldardyń negizinde kóz jetkizýge múmkindik alady.
Alaıda, atalǵan kitaptardyń eń basty qundylyǵy bir kezde kóńil qalaýymen, júrek ámirimen aıtylǵan bul únqosýlar Prezıdent týraly sóz degen úlken uǵymǵa ulasyp, onda bizdiń elimizdiń alýan qyrly beınesiniń – bizdiń armanymyzdyń, bizdiń Táýelsizdigimizdiń alyp polotnosy shynaıy ári aıqyn somdaǵandyǵy bolyp tabylady.
Kitaptar kópshilik oqyrman qaýymǵa arnalǵan.
«Egemen-aqparat».
