«Bul ákimshilik birlik elimizdegi on jetinshi aımaq bolady. Oblys ortalyǵy Qazaq handyǵynyń jáne búkil túrki áleminiń saıası ári rýhanı ortalyǵy bolǵan Túrkistan qalasyna kóshiriledi. Shymkent bizdiń eldiń ǵana emes, búkil Ortalyq Azııa óńiriniń ınvestısııalar, tehnologııalar jáne ıntellektýaldy resýrstar tartatyn jańa ortalyǵyna aınalady. Bul úshin barlyq jaǵdaı men qajetti áleýet bar. Bul qadam shahardyń teńgermeli áleýmettik-ekonomıkalyq damýyna jáne búkil óńir turǵyndarynyń turmys sapasynyń dáıekti túrde artýyna tyń serpin beredi», dedi Nursultan Ábishuly.
Túrkistan oblys ortalyǵy bolatynyn Nursultan Nazarbaev osydan 22 jyl buryn Túrkistanǵa kelgen saparynda aıtyp edi, endi mine, sózi men isiniń arasynda alshaqtyq bolmaıtynyn Elbasy osy tarıhı, taǵdyrly sheshimimen taǵy bir márte dáleldedi.
On jetinshi aımaqtyń ómirge kelýi – elimizdiń keregesi keńip, shańyraǵy bıikteı beredi degen sóz. Tutas Turannyń tulǵasy Maǵjan:
Túrkistan – eki dúnıe esigi ǵoı,
Túrkistan – er túriktiń besigi ǵoı.
Tamasha Túrkistandaı jerde týǵan
Túrkistan Táńir bergen nesibi ǵoı, – dep jyrlaǵan qasıetti, kıeli Túrkistan aty taǵy da jańalyqpen, jaqsylyqpen jańǵyryp, uly túrkiniń ánin aıtyp, máńgilik, kók aspannyń ózine asqaq qarap tur.
Túgel túrkini qýantqan habar – sonyń aıqyn aıǵaǵy. Qýanysh qutty, baqytymyz baıandy bolsyn, otandastar! Baqyt – birlikte, yrys – yntymaqta!
Halqymyzdy «Nurly jolmen» «Máńgilik Elge» bastaı ber, Elbasy.
Sábıt DOSANOV,
jazýshy, Memlekettik
syılyqtyń laýreaty
ALMATY
