Ataýly merekede tatar halqynyń án-jyrlary shyrqalyp, ulttyq oıyndarynan saıys ótti. Tatarstannyń eńbek sińirgen mádenıet qyzmetkeri, dańqty sportshy Rom Ilmatovtyń aıtýynsha, «Tatarcha kýrás» oınyna qatysýshylardyń sanynda shek bolmady.
Besqaraǵaı aýdanynan arnaıy kelgen bashkóldik tatar aǵaıyndar ulttyq taǵamdarynan dám usyndy. Barlyǵy jınalyp, Tatar halqynyń talantty uly Ǵabdolla Toqaı eskertkishiniń basyna gúl shoqtaryn qoıdy. Eldi berekeli tirlikke bastaıtyn shara tatar halqynyń dástúri boıynsha ımamnyń tilek aıtýymen bastaldy.
Sharaǵa Semeı qalasynyń ákimi Ermak Sálimov, oblystyq ishki saıasat basqarmasynyń basshysy Nellı Krasnobaeva, Besqaraǵaı aýdanynyń ákimi Dáýlet Batyrbaev qatysty.
– Qurmetti semeılikter jáne qala qonaqtary! Yntymaq-birligi jarasqan, Abaı, Muhtar, Shákárimder týǵan qasterli ólkede biz baýyrlas tatar halqynyń «Sabantoı» merekesin besqaraǵaılyq baýyrlarymyzben birge toılaýdamyz, – dedi Semeı qalasynyń ákimi Ermak Sálimov. – Beıbitshilikke, bereke-birlikke shaqyratyn bul mereke bizder úshin asa qymbat. Sondyqtan barshańyzǵa myqty densaýlyq, otbasylaryńyzǵa amandyq tileımin, mereke qutty bolsyn!
Oblystyq ishki saıasat basqarmasynyń basshysy Nellı Krasnobaeva oblys ákimi Danıal Ahmetovtiń atynan jınalǵan qaýymdy quttyqtap, arnaıy marapattaryn tabys etti. Besqaraǵaı aýdanynda Dostyq úıiniń jumysyn jandandyrǵany úshin aýdan ákimi Dáýlet Batyrbaev alǵys hatpen marapattaldy.
Eńbek ardageri Rashıda Hasanovanyń aıtýynsha, «Sabantoı» – tatar tilinde «jer óńdeý toıy» degen maǵynany bildiredi eken. Iаǵnı Sabantoı tatar halqynyń jerdi óńdep, egin salatyn kóktem kezeńiniń merekesi. Onyń ózegine egin bitik shyqsyn, jıyn-terim mol bolsyn, el toq bolsyn degen arman-tilekter jınaqtalǵan. Merekede tatar halqynyń ulttyq oıyndary – tatar kúresi, arqan tartý jáne taǵy da basqa kóptegen sporttyq oıyndar oınaldy. Sabantoıǵa kelgender tatar eliniń ulttyq taǵamdarynan dám tatyp, konserttik baǵdarlamany tamashalady.
Raýshan NUǴMANBEK,
jýrnalıst
SEMEI
