Baıqońyrdyń erteńin búginnen oılaıyq

Keshe Parlament Senatynyń Tóraǵasy Qaırat Mámıdiń tóraǵalyq etýimen palatanyń kezekti plenarlyq otyrysy bolyp ótti. Otyrys barysynda depýtattar Memleket basshysynyń Jarlyǵymen  L.G.Poltorabatko Senat depýtaty bolyp taǵaıyndalýyna baılanysty  ony Joǵarǵy Sot sýdıasy qyzmetinen bosatty. Kún tártibinde  «Indýstrııa­lyq-ınnovasııalyq qyzmetti memlekettik qoldaý týraly» jáne oǵan ilespe zań jobalaryn depýtattarǵa Indýstrııa jáne jańa tehnologııalar mınıstriniń birinshi oryn­ba­sary Albert Raý tanystyrdy. Odan belgili bolǵandaı, Úkimet, memlekettik organdar men jergilikti atqarýshy organdardyń ın­dýstrııalyq-ınnovasııalyq qyzmet salasyndaǵy quzyretin reglamentteıtin normalar naqtylanyp otyr. Depýtattar sózjarys barysynda memlekettik qoldaý jekelegen ká­siporyndarǵa emes, ınnovasııalyq jobalarǵa jasalǵany jón ekendigin basa aıtty.  Biraz talqylaýdan keıin zań jobasy qoldaý tapsa, iles­pe zań jobasy birinshi oqy­lymda maquldandy. «Ǵarysh  qyzmeti  týraly» jáne oǵan ilespe zań jobalary boıynsha baıandamany Ulttyq ǵarysh agent­tiginiń tóraǵasy Talǵat Musabaev jasady. Zań jobasymen ǵarysh qyz­meti salasyndaǵy qyzmetti lısenzııalaý, ǵylymı-zertteýler júr­gizý, ǵarysh júıeleri men ǵarysh  zymyran keshenderin jasaý jáne paıdalaný kózdeledi. Qaýipsizdik qaǵıdalaryn buzǵany úshin jaýap­ty­lyq, ǵarysh qyzmeti úshin jer sanattaryn belgileý, ǵaryshkerler men olardyń otbasyn turǵyn úı­men qamtamasyz etý jáne ózge de kóptegen normalar zańdyq qujatta kórinis tapqan. Sondaı-aq T.Musabaev depýtat­tar­dyń kóptegen suraqtaryna jaýap berdi. Máselen, Reseımen birlesken kásiporyn negizinde «Báı­terek» zymyran ǵarysh aılaǵyn salý jumystary jalǵasýda eken. Qazirgi tańda 200-ge tarta qazaq­standyq mamannyń osy baǵytta ter tógip júrgeni de belgili boldy. Sonymen qatar, 771 tonnalyq «An­gara» zymyranyn jasaý da qolǵa alynǵan. Senator Ǵanı Qasymovtyń suraǵyna oraı jaýabynda agenttik tóraǵasy «Proton» zymyran ushyr­ǵyshyn ushyrýǵa tyıym salý ázirge múmkin bolmaı otyrǵanyn jetkizdi. Onyń sózine qaraǵanda, Reseı osy zymyran ushyrǵysh tú­rin jylyna 15 ret ushyrady eken. Zymyrandy jetildirý nátıjesinde onyń   jerge qulaýynan buryn 10 tonna geptıl jerge tógilse, qazir onyń mólsheri 1,5 tonnany ǵana qu­raıtyny atap ótildi. Budan basqa, «Baıqońyr» ǵarysh aılaǵyn 2050 jylǵa deıin jalǵa alyp otyrǵan Reseı jylyna 300 mıllıon dollar tóleıdi. Depýtattar sondaı-aq «Qazaq­stan Respýlıkasynyń ulttyq qaýipsizdigi týraly» zań jobasyn qa­byldady. Qoldanystaǵy zań­dar­ǵa  zııatkerlik menshik máseleleri boıynsha ózgerister men tolyq­ty­rýlardy kózdeıtin zańdyq qujat ta  qoldaý tapty. Otyrysta, so­nymen qatar, qarjylandyrý tý­raly negizdemelik kelisim (QAZ: OAО́EY 2 kólik dálizi (Mańǵystaý obly­sy­nyń ýchaskeleri) ınves­tı­sııalyq baǵdarlamasy) ratıfı­kasııalandy. Asqar TURAPBAIULY.