Bas basylym «Astana aıshyqtary» taqyrybymen uıymdastyrǵan konkýrsqa respýblıkanyń túkpir-túpkirinen 20-dan astam úmitker 30-dan asa jumys usynǵan. Baıqaýdy uıymdastyrýdaǵy basty maqsat – qazaq baspasózinde umytylyp bara jatqan karıkatýra janryn qaıta jańǵyrtý. Egemenniń bul bastamasyn sharaǵa qatysýshylar, zııaly qaýym ókilderi barynsha qoldaıtynyn bildirdi. Kórmege qoıylǵan úzdik 15 sýrettiń ishinen oza shapqan úsh avtordyń jumysy júldeli oryndardan kórinip, bir karıkatýrashy yntalandyrý syılyǵyna ıe boldy. Atap aıtsaq, birinshi oryn almatylyq belgili karıkatýrashy Ǵalym Smaǵululyna berilip, 300 myń teńgelik sertıfıkat tabystaldy. О́skemendik Berik Qaınaruly ekinshi (200 myń teńge), al aqtóbelik Qaırat Bolatbaıuly úshinshi orynǵa (100 myń) ıe boldy. Tarazdyq Almıra Omarovaǵa yntalandyrý syılyǵy berildi. Karıkatýraǵa baılanysty elimizde iri konkýrstar 20 jyldan beri birinshi ret ótkizilip otyr.
«Astana qalasynyń 20 jyldyǵyna oraı «Egemen Qazaqstan» gazetiniń júldesi úshin qazaq baspasózinde umytylyp ketken karıkatýra janryn qaıta jańǵyrtyp, «Astana aıshyqtary» taqyrybymen karıkatýra konkýrsyn jarııalaǵan bolatynbyz. Egemenniń bul bastamasy sýretshiler arasynda keńinen qoldaý taýyp, konkýrsqa 20-dan astam úmitkerden 30-dan asa jumys kelip tústi. Olardyń arasynan eń úzdikteri tańdalyp, búgingi marapattaý rásimine kelip otyr», dedi «Egemen Qazaqstan» gazetiniń basshysy Darhan Qydyráli.
Karıkatýra tek kemshilikti ǵana kórsetetin janr dep tar oılaıtyndar da bar. Biraq shyntýaıtyna kelgende karıkatýra arqyly jaqsylyqty da, kemshilikti de teńdeı etip kórsetýge bolady. Ol sýretshiniń sheberligine baılanysty. Bul konkýrstyń bas júldesin alǵan shyǵarma nysanaǵa óte keń ólshemmen kelgen. Taqyrypty qylqalammen ashý, oǵan oıdy ushastyrý – qıynnyń qıyny. Osy jaǵynan alǵanda júldege ıe bolǵan avtor oıynyń ushqyrlyǵy men qalamynyń sheberligi anyq kórinedi.
Karıkatýra tek qana birjaqty syn emes. Ol – úlken óner, astarly sóz, tapqyr sheshim, utymdy oı, saraptama men synnyń toǵysy. Keıde karıkatýranyń úlken maqalanyń, kitaptyń júgin arqalap turatyn tustary bolady. Úlken órkenıetti elderde qazir baspasóz karıkatýrasyz shyqpaıdy. Bul – baspasózdiń úlken bir bólshegi, iri salasy. Sondyqtan bul salany da jandandyrǵan jón.
Karıkatýra ónerin kópshilik qaýym tek adam tanymyna ájýaly ázil ákeledi dep túsinedi. Asylynda, ol – bir sát oı-sanany sergitip, ájýadan bólek áserli oı nuryn shashatyn aýqymy keń óner. Ár qoǵamnyń saıası, áleýmettik, psıhologııalyq, moraldyq bolmys-sıpaty osy ónerde qylqalam sheberiniń qııaly arqyly qapysyz qalyptalady. Osy maqsatta karıkatýranyń úlken mektebi bar «Egemen Qazaqstan» gazeti kenjelep qalǵan osy ónerdiń keńinen damýyna óz úlesin qosyp, qylqalam sheberleriniń ospaq ónerin oqyrmandarǵa tereń nasıhattaýdy qolǵa alyp otyr.
Báıgeni uıymdastyrý jumysynyń basy-qasynda júrgen sýretshi Aıdarbek Ǵazızuly: «Sýretshilerge qoıylǵan talap ońaı bolǵan joq. Karıkatýra týraly qalyptasqan taptaýryndy buzý úshin osyndaı báıgeler kerek. Astanamyzdyń jaınaǵan dıdaryn osy óner arqyly berý – qatysýshylarǵa úlken syn boldy. Tapqyr, qııaly júırik sýretshiler báıgeden súrinbeı keldi», dedi.
Shara barysynda, sondaı-aq Astana qalasynyń 20 jyldyǵyna arnalǵan «Egemen Qazaqstan» kitaphanasy» serııasymen jaryq kórgen, elordamyzdyń aıshyqty kelbetin sózben árlegen «Baqorda» kitabynyń tanystyrylymy ótti.
Baǵashar TURSYNBAIULY,
«Egemen Qazaqstan»
