Táýelsizdikke taǵy bir tartý

Táýelsizdik kúni qarsańynda Astanadaǵy №64 mektep-lıseıde «Qazaqtyń Qanı­pasy» atanǵan KSRO Memlekettik syılyǵynyń laýreaty, Qazaqstan Respýblı­ka­sy­nyń eńbek sińirgen muǵalimi, professor Qanıpa Bitibaevanyń Shyǵys Qazaqstan ob­lysy, О́skemen qalasyndaǵy ǵylymı-ádistemelik zerthanasynyń fılıaly ashyldy. Bul ıgilikti sharanyń bastamasy osydan bir aı buryn qolǵa alynǵan edi. Elordanyń Shyǵysta ótken kúnderi kezinde zerdeli ustazdar qaýymy Qanıpa Omarǵalıqyzy eńbek etetin Jambyl atyndaǵy oblystyq mamandandyrylǵan mektep-gımnazııa ınternatynda bolyp, jumysymen tanysqan eken. Sol júzdesýde osyndaı zerthana bólimshesin Astanada da baıandy etý máselesi  qozǵalsa, endi  mine, júzege asty. Dáýirdiń dara ustazynyń ǵylymı-ádistemelik zerthanasynyń múmkindigin keń­eı­tý, ustazdyń jańashyl is-tájirıbesin taratý maqsatynda ashylǵan fılıal­dyń al­ǵash­qy otyrysynda Astanamyzdaǵy myńǵa tarta qazaq tili men ádebıeti pánderiniń mu­ǵalimderi óz oılaryn ortaǵa salyp, tájirıbe almasty. Budan keıin Qanıpa eńseli elordanyń búgingi kórkine tánti bolǵanyn, bir kezderi birli-jarym ǵana qazaq tilinde sabaq ótkizetin bilim uıalary bolsa, qazir taza memlekettik tilde oqytatyn bilim or­dalary 23-ke jetkenin, sol sekildi 35 aralas, 11 orys tildi mektepterde sabaq berip júr­gen muǵalimderdiń talpynysyna dán rızalyǵyn bildirip, ádebıet pánin oqytý jaıyna toqtaldy. Ol sonymen qatar, eski súrleýden shyǵyp, táýelsiz elimizdiń búgingi ádebıetin de taldap oqytý jaıyn qozǵap, keshegi alyptardan keıingi ádebıet ókilderi týraly óziniń arnaıy kitap jazǵanyn, onda Muqaǵalı Maqataev, Qadyr Myrzalıev, Tumanbaı Moldaǵalıevten bastap, aramyzda júrgen aqyndar Ulyqbek Esdáýlet, Esenǵalı Raýshanov, ózge de aqyn-jazýshylar shyǵarmashylyǵyn talda­ǵanyn aıtty. Basqosýdy belgili jazýshy Shárbaný Beısenova túıindep, ustaz ulaǵaty týraly tebirene áńgimeledi. Súleımen MÁMET. Astana.