Elbasy Qazaqstannyń aspan tústes kók týy Astananyń qalyptasýy men búkil elimizdiń damý jolyn aıshyqtaıtynyn aıtty.
– Batyr babalarymyz bizdiń zor jeńisterge jetýimizdi tilep, árdaıym týdy tik ustaýdy ósıet etti. Sodan beri biz barlyq jetistikke kók baıraqtyń astynda qol jetkizip kelemiz. «Qazaqstan, Táýelsizdik, Astana» degen túsinikter bizdiń memlekettigimizben, bolashaǵymyzben birtutas uǵymǵa aınaldy. Qazaqstan – bizdiń jalǵyz Otanymyz, Táýelsizdik – oryndalǵan armanymyz. Álem elderi týlarynyń eshqaısyna uqsamaıtyn kók týymyzdy dúnıejúzi moıyndady, – dedi Memleket basshysy.
Memleket basshysy elimizdiń syrtqy saıasatynyń beıbitsúıgish sıpatyn atap ótip, Qazaqstannyń Qarýly Kúshteri úshin áskerı kadrlardy sapaly daıyndaýdyń mańyzdylyǵyn aıtty.
– Sizderdiń áskerı qyzmetterińiz beıbit jaǵdaıda ótsin dep tileımin. Biraq memleket árdaıym óziniń qaýipsizdigi men shekara bútindigin oılaýǵa tıis. Sondyqtan, biz ofıserlerimizdi táýelsiz Qazaqstannyń jańa jaǵdaıynda, jańa Qarýly Kúshterimiz úshin oqytyp, tárbıeleımiz. Áskerı qyzmetti laıyqty atqarýdyń úlgisin kórsetińizder, – dedi Qazaqstan Prezıdenti.
Nursultan Nazarbaev jas ofıserlerge arnaǵan sózinde memlekettik týǵa zor qurmet kórsetý Otandy súıýmen bara-bar ekenin atap ótti. Bul qazaqstandyq patrıotızm qundylyqtaryn jáne elimizdegi ulttyq biregeılikti nyǵaıta túsedi.
– Búgin áskerı oqý oryndarynyń úzdik túlekteri ofıserlik shen alady. Sizder arqyly osy jyly oqýyn bitirip jatqan jas ofıserlerdiń bárin quttyqtaımyn. Osy sátten bastap sizderge Otan qorǵaý, Qazaqstan azamattarynyń beıbit ómiri men tynyshtyǵyn kúzetý úshin kúrdeli de mártebeli mıssııa júkteledi. Sizder uly babalarymyz amanat etken qasıetti boryshty laıyqty atqarýlaryńyz kerek. Búkil ómir joldaryńyzda ofıserlik ataqty úlken abyroımen alyp júrińizder! – dedi Memleket basshysy.
Saltanatty rásim barysynda Qazaqstan Prezıdenti – Qazaqstan Respýblıkasynyń Joǵarǵy Bas qolbasshysynyń qolynan elimizdiń joǵary áskerı oqý oryndarynyń 12 úzdik túlegi Qarýly Kúshterdiń ofıserlik shenderin aldy.
Sońynda Nursultan Nazarbaev barsha jurtty Astananyń 20 jyldyǵymen quttyqtap, Qazaqstan halqyna baq-bereke tiledi.
