Jazǵy jýrnalıstıka mektebi – bul sertıfıkattaýshy baǵdarlama. Ol merzimdi basylymdar, radıo, telearnalar jáne onlaın júzindegi buqaralyq aqparat quraldaryna sapaly jýrnalıstik materıaldar daıyndaý úshin negizgi quraldarmen jumys isteý daǵdysyn damytady. Sonymen qatar Jazǵy mektep ózara bilim jáne tájirıbe almasýǵa, sondaı-aq BJZQ mamandarynan tikeleı aqparat alýǵa múmkindik beretin biregeı tuǵyrnama.
Jazǵy mekteptiń maqsaty:
– bilim alýǵa, ózara tájirıbe almasýǵa, sondaı-aq, jýrnalıster men blogerlerdiń kásibı turǵyda birlese áreket jasaýyna múmkindik beretin orta jasaý;
– zeınetaqymen qamsyzdandyrý salasy boıynsha jýrnalısterdiń biliktiligin damytý;
– joǵary sapaly taldamalyq materıal daıyndaıtyn jýrnalısterdiń zeınetaqymen qamsyzdandyrý salasy boıynsha quzyretin arttyrý.
Bıylǵy oqytý modýlderi zeınetaqy quqyǵyn qalyptastyrý jáne júzege asyrýdy, qoldanystaǵy elektrondyq qyzmetterdiń qalaı jumys isteıtindigin kórsetýdi, álem elderiniń jınaqtaýshy zeınetaqy júıesimen tanysýdy, bolashaq zeınetaqyny josparlaý jáne esepteý taqyryptaryn qamtıdy.
Jazǵy mektep sharasy «BJZQ» AQ Almaty qalasyndaǵy fılıalynda 13 shilde kúni orys tilinde jáne 16 shilde kúni qazaq tilinde ótkiziledi. Sarapshy retinde Qordyń jáne Ulttyq Banktiń mamandary qatysady. Olar Qazaqstan Respýblıkasynyń zeınetaqy zańnamasyndaǵy ózgerister, zeınetaqy quqyǵyn qalyptastyrý jáne júzege asyrý máseleleri jáne halyqaralyq zeınetaqy júıeleriniń modelderi týraly áńgimeleıtin bolady.Budan basqa, «Bolashaq zeınetaqyny qalaı josparlaýǵa bolady?» degen taqyrypta sheberlik synyby ótkiziledi.
Qatysýshylar Qordyń kórsetetin qyzmetteri jáne óńirlik jelisiniń jumystarymen tanysady. Sondaı-aq, sarapshylardan ózderine kerekti saýaldardyń jaýabyn tabady.
Daıyndaǵan Aınash ESALI,
«Egemen Qazaqstan»
ALMATY
