Osylaısha, Aqtóbede táýligine 50-den 70 tonnaǵa deıin tátti taǵamdar shyǵaratyn «Aıs plıýs» JShS balmuzdaq óndirý sehy ashylady. «Aqtóbe» ındýstrıaldy aımaǵy qýattylyǵy jylyna 1 200 tonna ónim bolatyn «PolıVest» JShS polıetılen paketterin óndirý zaýytymen tolyǵady.
Budan basqa, aqtóbelikterdi Tuńǵysh Prezıdent atyndaǵy saıabaqta kópten kútken akvaparktiń ashylýy da qýantady. Aıta ketý kerek, «AKTOBE INVEST-2016» halyqaralyq ınvestısııalyq forýmy kezinde oblys ákimdigi men «Ulan kompanııasy» JShS onyń qurylysy týraly kelisimge qol qoıǵan bolatyn.
Aqtóbedegi oıyn-saýyq ındýstrııasy oblystaǵy Bala jylyna oraı salynyp jatqan «Yurta Park» otbasylyq demalys saıabaǵymen de tolyǵatyn bolady. Alaıda, munda tek balalarǵa ǵana emes, eresekterge de qyzyq bolady dep kútilýde. Saıabaqta endigi mınıgolf oınaıtyn alańqaı, ashyq aspan astyndaǵy kınoteatr, jasandy jartas, arqan baǵy, kitaphanalar, etnoaýyl men baılanys zoobaǵy, aýmaǵy 20*30 metrlik labırınt, barlyq kezeń boıy jumys jasaıtyn muz aıdyny, planetarıı, sadaq pen arbaletten atatyn stendter jáne t.b. ornalastyrylǵan.
Oblys aýdandarynda 8 sporttyq jáne oıyn alańdary, Áıteke bı aýdanynyń Araltóbe aýylynda 150 oryndyq stadıon, Keńqııaq aýylynda dárihana ashylsa, Hromtaý aýylynyń Dóń aýylynda 600 oqýshyǵa arnalǵan mektep paıdalanýǵa beriledi.
«Týǵan jerge taǵzym» aksııasy aıasynda eldi mekenderdi abattandyrý jaǵyna erekshe úles qosatyn bolady. Elorda kúnine oraı aksııa qatysýshylary men eline beı-jaı qaramaıtyn Aqtóbe oblysynyń týmalary ózderi týyp-ósken qalalary men aýyldaryna Jambyl Jabaevtyń eskertkishin, úsh stela eskertkishin, eki jańa gúlzar baǵyn, jylyjaı, sýburqaq pen tennıs kortyn tartý etedi. Sonymen qatar, olardyń qarjysyna Qaraýylkeldi aýylynda shamamen 500 metrlik jaıaýjol men Baıǵanın aýdanynyń Jarqamys aýylynda qatty turmystyq qaldyqtar polıgony salyndy.
Mereke kúnderi oblystaǵy medısınalyq mekemeler jelisi de jańa nysandarmen tolyǵady. Atap aıtqanda, Qobda aýdanynyń Terisaqqan aýylynda feldsherlik-akýsherlik pýnkt, al Bestaý aýylynda medısınalyq pýnkt ashylmaq. Atalǵan medısınalyq mekemeler memlekettik-jekemenshik seriktestik aıasynda turǵyzylǵan.
Aqtóbe oblysynda Astananyń 20 jyldyǵyna oraı 430 myńǵa jýyq adamdy qamtıtyn barlyǵy 1200 qoǵamdyq-saıası, mádenı-buqaralyq is sharalar ótkizý josparlanyp otyr.
Temir Qusaıyn
«Egemen Qazaqstan»
Aqtóbe
