Ádebıettanýshy, ónertanýshy mamandar men jas ǵalymdar qatysqan basqosýda qazirgi ádebıet pen ónerdegi Astana beınesiniń somdalýy, álemdik deńgeıde qazaqstandyq ımıdjdi qalyptastyrýdaǵy ekonomıkalyq, mádenı, rýhanı róli syndy san salaly gýmanıtarlyq máseleler tóńireginde oı-tujyrymdar aıtyldy.
M.O.Áýezov atyndaǵy Ádebıet jáne óner ınstıtýty dırektory, QR UǴA akademıgi Ýálıhan Qalıjanov jıyndy kirispe baıandamasymen bastap, «Táýelsizdik egemendik tarıhyn ǵana emes, Qazaqstannyń astanasyn da ózgertti. Astananyń Saryarqa tósine qonys aýdarýynyń barlyq ótkelderinde boldym. Men úshin ol bıik mártebe. Aınalasy az ýaqyt ishinde Aqmola ajaryna ajar qosylyp, gúldenip te, túrlenip te shyǵa keldi. Zamanaýı sáýlet óneriniń ǵajaıyp qurylystaryn esepke almaǵanda, Astana álem kartasynda eń jas elorda bolǵanymen, jahandyq saıası-ekonomıkalyq máselelerdi sheshetin bas qalaǵa aınaldy» dep atap ótti. Al jazýshy, ınstıtýttyń bas ǵylymı qyzmetkeri, fılologııa ǵylymdarynyń doktory N.Aqysh, ınstıtýttyń Teatr jáne kıno bóliminiń meńgerýshisi, ónertaný kandıdaty A.Muqan jáne M.Táshimova, A.Ahmetova, A.Kenjequlova, E.Qýatbekuly, A.Muratqyzy, A.Espenova syndy magıstr, doktoranttar ádebıet, beıneleý, teatr, kıno, keskindeme, mýzyka ónerindegi Astana beınesin sýrettegen týyndylarǵa sholý jasap, úzdik shyǵarmalarǵa ǵylymı-teorııalyq taldaýlar keltirdi.
Dúnıejúzine Qazaqstan astanasy retinde tanylǵan jas qala – Astananyń ásem kelbeti rýhanı qundylyqtardyń qaınarkózi retindegi kórkem óner týyndylarynyń jaryq kórýine negiz bolýda.
Elvıra Serikqyzy,
«Egemen Qazaqstan»
