Sharaǵa qatysýshylar aldynda sóılegen sózinde Prezıdent Memlekettik týdyń dástúrli túrde Astana kúni qarsańynda kóterilýi osy jalpyulttyq merekeniń mártebesin asqaqtata túsetinin jetkizdi.
«Jelbiregen kók Týymyzdyń astynda elordamyzdyń 20 jyldyq mereıtoıyna arnalǵan sharalardy bastaǵaly otyrmyz. Barshańyzdy Astananyń 20 jyldyq merekesimen shyn júregimnen quttyqtaımyn. Bıyl dástúrli merekemiz Astanamyzdyń 20 jyldyǵyna týra kelip tur. 20 jyl degen tarıh úshin qas-qaǵym sát. Eki ǵasyr toǵysynda en dalada elorda salǵan jalǵyz el – Qazaqstan. Osy ýaqyt aralyǵynda atqarǵan jumystardyń bári jelbiregen kók Týymyzdyń astynda ótip jatyr», dedi N.Nazarbaev.
Prezıdent Qazaqstannyń aspan tústes kók Týy Astananyń qalyptasýy men búkil elimizdiń damý jolyn aıshyqtaıtynyn aıtyp, 20 jyl ishinde elordada álemdik deńgeıdegi jıyndar ótkizilip kele jatqanyn atap ótti.
«Batyr babalarymyz bizdiń zor jeńisterge jetýimizdi tilep, árdaıym týdy tik ustaýdy ósıet etti. Sodan beri biz barlyq jetistikke kók Baıraqtyń astynda qol jetkizip kelemiz. «Qazaqstan, Táýelsizdik, Astana» degen túsinikter bizdiń memlekettigimizben, bolashaǵymyzben birtutas uǵymǵa aınaldy. Qazaqstan – bizdiń jalǵyz Otanymyz, Táýelsizdik – oryndalǵan armanymyz. Álem elderi týlarynyń eshqaısysyna uqsamaıtyn kók Týymyzdy dúnıejúzi moıyndady», dedi Memleket basshysy.
Sondaı-aq Elbasy Týdyń mańyzy týraly áńgimelep, ata-babalarymyzdyń «Týyń túspesin» dep bata bergenin eske saldy. «Bul – kıeli bata. Tý – eldikpen teń!», dedi N.Nazarbaev.
Memleket basshysy elimizdiń syrtqy saıasatynyń beıbitsúıgish sıpatyn atap ótip, Qazaqstannyń Qarýly Kúshteri úshin áskerı kadrlardy sapaly daıyndaýdyń mańyzdylyǵyna toqtaldy.
«Sizderdiń áskerı qyzmetterińiz beıbit jaǵdaıda ótsin dep tileımin. Biraq memleket árdaıym óziniń qaýipsizdigi men shekara bútindigin oılaýǵa tıis. Sondyqtan biz ofıserlerimizdi táýelsiz Qazaqstannyń jańa jaǵdaıynda, jańa Qarýly Kúshterimiz úshin oqytyp, tárbıeleımiz. Áskerı qyzmetti laıyqty atqarýdyń úlgisin kórsetińizder», dedi Prezıdent.
N.Nazarbaev jas ofıserlerge arnaǵan sózinde Memlekettik týǵa zor qurmet kórsetý Otandy súıýmen para-par ekenin atap ótti. Bul qazaqstandyq patrıotızm qundylyqtaryn jáne elimizdegi ulttyq biregeılikti nyǵaıta túsedi.
«Búgin áskerı oqý oryndarynyń úzdik túlekteri ofıserlik shen alady. Sizder arqyly osy jyly oqýyn bitirip jatqan jas ofıserlerdiń bárin quttyqtaımyn. Osy sátten bastap sizderge Otan qorǵaý, Qazaqstan azamattarynyń beıbit ómiri men tynyshtyǵyn kúzetý úshin kúrdeli de mártebeli mıssııa júkteledi. Sizder uly babalarymyz amanat etken qasıetti boryshty laıyqty atqarýlaryńyz kerek. Búkil ómir joldaryńyzda ofıserlik ataqty úlken abyroımen alyp júrińizder!» dedi Memleket basshysy.
Saltanatty rásim barysynda Qazaqstan Respýblıkasynyń Prezıdenti – Qarýly Kúshterdiń Joǵarǵy Bas Qolbasshysynyń qolynan elimizdiń joǵary áskerı oqý oryndarynyń 12 úzdik túlegi Qarýly Kúshterdiń ofıserlik shenderin aldy.
Sońynda Nursultan Nazarbaev barsha jurtty Astananyń 20 jyldyǵymen quttyqtap, halqymyzǵa baq-bereke tiledi. Osylaısha, elordanyń mereıli merekesi qarsańynda táýelsiz Qazaqstannyń Baıraǵy saıyn Saryarqa tósinde jelbiredi. Asqaqtaı ber, beıbitshilik pen tutastyqtyń sımvoly – qasterli kók Tý!
Abaı ASANKELDIULY,
«Egemen Qazaqstan»
