Bıylǵy baıraqty básekege Eýropa, Azııa, Afrıka qurlyǵynda ornalasqan 10 eldiń eń úzdik atletteri qatysty. Atap aıtar bolsaq, Qazaqstan, Grýzııa, Iran, Ázerbaıjan, Tájikstan, Qyrǵyzstan, О́zbekstan, Sırııa, Túrikmenstan men Kenııadan 300-ge jýyq sportshy qashyqtyqqa júgirý, sekirý, ıadro laqtyrý, laqtyrý (naıza, dısk, balǵa) saıystarynan baq synady.
Jarystyń alǵashqy kúnindegi 100 metrge júgirýden qyzdar arasyndaǵy saıysta elimizdiń qazirgi tańdaǵy úzdik sprınteri Vıktorııa Zıabkına chempıon atansa, 400 metrge júgirýden Shyǵys Qazaqstan oblysynyń sportshysy Elına Mıhına jeńiske jetti. Al 1500 metrdegi saıysta Altay athletics klýbynyń kenııalyq atleti Karolın Kıpkırýı eshkimge múmkindik qaldyrǵan joq. 100 metrge kedergiler arqyly júgirýden Áıgerim Shynazbekova top jarsa, erler arasyndaǵy básekede 2018 jylǵy Azııa chempıonatynyń qola júldegeri Davıd Efremov jeńiske jetti.
400 metrge kedergiler arqyly júgirýden erler arasynda Dmıtrıı Koblov, áıelder arasynda Svetlana Kýznesova altyn júldeni ıelendi. Iаdro laqtyrýdan erler arasynda Ivan Ivanov (19.21 metr), qyzdardan grýzııalyq Sofıko Chatırıshvılı top jardy (14.84). Sekirý saıystarynda da qazaqstandyq atletter eshkimge des bergen joq. Aldymen bıiktikke sekirýden Nadejda Dýbovıskaıa jarys jeńimpazy atansa, syryqpen sekirýde Anastasııa Ermakova, uzyndyqqa sekirýden Ekaterına Ektova bas júldeni enshiledi. Rım Olımpıadasynyń kúmis júldesin ıelengen Ǵusman Qosanovtyń ózi júgirgen 100 metrdiń altyn júldesi bul joly sheteldik sportshynyń enshisinde ketti. Irannan kelgen Reza Haseımı jeńip aldy. Ol sondaı-aq osy saıys túrine tigilgen 1000 AQSh dollaryna ıe boldy.
Ekinshi jarys kúninde erler arasynda 400 metrge júgirýden Mıhaıl Lıtvın chempıon atandy. Soltústik Qazaqstan oblysynyń sportshysy jeńiske jetip qana qoımaı, Qazaqstannyń rekordyn jańartty. 22 jastaǵy atlet 400 metrdi 45.50 sekýndta júgirip ótti. 200 metrge júgirýden erler arasyndaǵy saıysta Vladıslav Grıgorev pen qyzdar arasyndaǵy básekede Vıktorııa Zıabkına qatarynan ekinshi jyl Ǵusman Qosanov Memorıaly jarysynda jeńiske jetti. 800 metrge júgirýden erler arasynda Vladıslav Grıgorev, áıelder arasynda Margarıta Muqasheva top jardy.
Sondaı-aq 5000 metrge júgirýden Dmıtrıı Ivanchýkov, Gúlshanoı Satarova, úsh qarǵyp sekirýden jas sportshylardyń biri Irına Ektova chempıon atandy. Dısk laqtyrý básekesinde Marııa Telýshkına men Aleksandr Mamontov, balǵa laqtyrý saıysynda Dıana Núsipbekova men Mergen Mammedov (Túrikmenstan), naıza laqtyrý boıynsha Samobar Erkınova (О́zbekstan) men Akım Dementev (О́zbekstan) jarys jeńimpazy atandy.
100 metrge júgirý boıynsha komandalyq estafetadan Qazaqstannyń erler jáne qyzdar quramasyna laıyqty qarsylas tabylmady.
Álı BITО́RE,
«Egemen Qazaqstan»
