Zamanaýı keńseniń ashylýyna «Samuryq-Qazyna» qorynyń basqarma tóraǵasy Ahmetjan Esimov, vıse-premer Asqar Jumaǵalıev, Aqparat jáne kommýnıkasııalar mınıstri Dáýren Abaev, Qazposhtanyń basqarma tóraǵasy Sáken Sársenov jáne taıaýda Astanaǵa kelgen robot Sofııa qatysty.
– Qazposhta jańa keńsesin IT-saladaǵy sońǵy jetistikterdiń barlyǵy jınalǵan jerde ashyp otyr. Biz otandastarymyzǵa dástúrli qyzmetterdi múldem jańa formatta alýǵa bolatynyn kórsetemiz. Jańa keńseniń ashylýyna Sofııany da kezdeısoq ákelgen joqpyz. Sıfrly transformasııa ıdeıasy búkil álemdi jaýlap alǵan ýaqytta biz de úzdik álemdik tájirıbelermen tanysyp, úzdik mamandardan sabaq alý múmkindigimizdi jiberip almaýǵa tyrysamyz. Qazir Úkimet tarapynan sıfrlandyrý ıdeıasyn jan-jaqty qoldaýdyń arqasynda bizdiń elimiz de osy salada aldyńǵy qatarǵa qosylyp, mamandar suranysqa ıe bolýda, – dedi Qazposhta basshysy S.Sársenov.
Sharaǵa qatysýshy álemdegi eń tanymal robot – genoıd Sofııa meımandarǵa Qazaqstannyń sıfrly júıege den qoıyp otyrǵandyǵynan habardar ekenin jetkizip, Astananyń kórkine tánti ekenin aıtyp berdi. Atalǵan robot jasandy ıntellektke ıe, kórneki aqparatty jáne tulǵa taný tehnologııasyn óńdeý fýnksııalarymen jabdyqtalǵan. Robot Astanaǵa Qazposhtanyń qujattaryn elektrondy túrge kóshirip jatqan Documentolog kompanııasynyń qoldaýymen jetkizildi.
Dástúr boıynsha, is-sharanyń qonaqtaryn Japonııadan ákelingen jańa robot-keńesshi Pepper qarsy aldy. HD-kameralar jáne sensorlardyń arqasynda ol qorshaǵan ortasyn tanyp, adam emosııalaryn bile alady. Pepper qatysýshylarǵa Qazposhta qyzmetteri týraly málimdep, olarǵa ekskýrsııa júrgizdi. Aıta keterligi, Qazposhtanyń jańa keńsesinde dástúrli bankomattar men tólem termınaldarymen qosa gıbrıdtik bankomat bar. Odan onlaın keńester jáne post.kz qyzmetterin alýǵa, tólem kartalary nemese qolma-qol aqsha kómegimen túrli tólemder tóleýge bolady. Klıentterdi sáıkestendirý saýsaq izderi men bıometrııa arqyly júrgiziledi. VR-bóliminde kórmege kelýshiler vırtýaldy týrdy tamashalap, qyzmettermen tanysyp, trek-nómiri boıynsha sálemdemesin de taba alady. Sonymen qatar AR-kıiný bólmesi onlaın-dúkennen tapsyryspen alǵan kıimderdi kıip kórýge múmkindik beredi. Prınter arqyly 30 mınýttyń ishinde (bas kıim, moıynoraǵysh, oramal, jeıde) basyp shyǵaryp, selfı-dronnyń kómegimen túsken sýretti shyǵaryp alýǵa nemese elektrondy poshtaǵa jiberýge bolady. Buǵan qosa, keńsede Nazarbaev Ýnıversıtetiniń túlekteri jasaǵan roboposhtashy ornalastyrylǵan. Ol EKSPO aýmaǵynda ornalasqan keńselerge aldyn ala belgilengen marshrýtpen hat-habarlar jetkizip turady.
Erkejan AITQAZY,
«Egemen Qazaqstan»
