«Atyraý Astanany quttyqtaıdy». Ulttyq akademııalyq kitaphanada osyndaı ataýmen kórme ashyldy. Astananyń 20 jyldyǵyna, Atyraýdyń 80 jyldyǵyna, Ulttyq dombyra kúnine arnalǵan kórmege óńirdegi mýzeıler men kitaphanalardaǵy eń qundy jádigerler qoıyldy. Olardyń arasynda «Altyn adam» men dombyra kolleksııasy da bar. 200-ge jýyq tarıhı-etnografııalyq, arheologııalyq jádigerler astanalyqtar men qala qonaqtarynyń nazaryna usynyldy. Atyraýdan shyqqan aqyn-jazýshylardyń kitaptary da kórmeden oryn alǵan. Ortaǵasyrlyq Saraıshyq qalashyǵynyń ornynan tabylǵan qundy dúnıelerge qyzyǵýshylyq tanytqandar qatary kóp boldy.
Shara aıasynda «Dombyra-dastan» kitabynyń tusaýkeseri ótti. Aıta keteıik, Atyraý oblystyq tarıhı-ólketaný mýzeıinde qazaqtyń belgili óner qaıratkerleriniń dombyralary saqtaýly. Bul kitapta mýzeı qoryndaǵy sol aspaptar jaıynda derekter toptastyrylǵan.
Memleket basshysy bekitken Ulttyq dombyra kúniniń qurmetine oraı jergilikti ónerpazdar Qurmanǵazy men Dınanyń kúılerin tartyp, sharanyń mánin arttyrdy.
– Bul kórme Atyraý oblysynyń baı murasy týraly tolyq málimet berdi. Belgili aqyn-jazýshylardyń, dombyrashylardyń shyǵarmashylyqtarymen tanystyq. Árıne bir kórme arqyly aımaqtyń bar baılyǵyn kórsetý qıyn, alaıda Altyn adam, dombyra kolleksııasy, keremet kitaptar sııaqty negizgi jádigerler óńir týraly shejireli syr shertedi, deıdi Ardagerler uıymy ortalyq keńesi tóraǵasynyń orynbasary О́mirzaq Ozǵanbaı.
Baqytgúl BABASh,
«Egemen Qazaqstan»
ATYRAÝ
