Toıǵa tilek

Qýanyshymyz uzaǵynan bolsyn Elbasymyz kásipkerlermen bir kezdeskeninde: “Biz – “Mersedes” kóligin, “Boıng” ushaǵyn shyǵaryp, álemdi tańqaldyra almaımyz. Oǵan tyrashtanýdyń qajeti de joq. Qazaqstanda egistik, jaıylym­dyq jer mol. Biz álemdik naryqtan óz ornymyzdy tapqymyz kelse, oǵan aýyl sharýa­shylyǵyn kóterý arqyly qol jetkizemiz”, degen turǵyda oı aıtqan edi. Onyń aqıqattyǵyna kózimiz jetip jatyr. Keıde oılaımyn. Keshe kim edim, búgin kimmin dep. Áke erte ketti. Jetimdeý óstik. Búginde qordaly ormandaımyn. 2600-deı usaq mal jáne túıe sharýashylyǵym bar. Onyń syrtynda aınalysatyn basqa kásipterim de joq emes. Eshkimniń qorasyna túsken emespin. Aq adal malym, mańdaı terimniń óteýi. Men buǵan qalaı jettim? Elbasynyń tapsyrmasymen Úkimet aýyl sharýashylyǵyna qyrýar qarjy bólip jatyr. Jeńildetilgen nesıe alǵyńyz kele me, bıznes-josparyńyzdy usynyńyz. Onyń syrtynda asyl tuqymdy túlik ósirseńiz sýbsıdııa tólenedi. Baý-baqsha egip, jylyjaı salyp, kókónis ósir, kásipkerlikpen aınalys –  júgińniń bir shetin Úkimet kóteredi. Jarty shyǵynyńdy ótep beredi. Budan artyq qandaı jaqsylyq jasaýǵa bolady?! Otanym meni aýqatty adamdardyń qataryna qosty. Otbasymnyń quqyǵy qorǵaýly, bala-shaǵam alańsyz bilim alýda. Eshteńege muqtaj emes. Úkimet maǵan eshteńe bermedi dep jatyp-isher jalqaýlar aıtpasa, esti adam osynyń qadirin bilýi kerek. Otanym, elim úshin maqtanatyn, árbir jaqsylyǵyna qýanatyn azamat­pyn. Astanaǵa barsań, jaýhar qala úshin keýdeńdi maqtanysh kerneıdi. Álem jurty Qazaqstandy moıyndady. Bizdiń Elbasymyzdy dúnıe júzin­degi myqty saıasatkerlerdiń, Memleket basshylarynyń qataryna qoıdy. Bul barlyq qazaq, qazaqstandyq úshin maqtanysh bolsa kerek. Biz mundaı jetistikterge táýelsizdik arqyly jettik. Osy qýanyshymyz uzaǵynan bolǵaı! Ábdihalyq QASYMBAI, “Shymkent-Et” JShS-niń dırektory. Ońtústik Qazaqstan oblysy.   El ıgiligi eseleı bersin Elimiz táýelsizdigin alǵan kúnnen bastap, memlekettik qyz­metkerlerge  artylǵan jaýapkershilik az bolǵan joq. 90-shy jyldar­dyń basyndaǵy aýyr kúnder  qazaqstandyqtardyń  esinde. Degenmen, bárine de shydadyq, jeńe bildik. Kóshbasshymyz Nursultan Nazarbaevtyń basshylyǵymen táýelsiz Qazaqstan  damýy jóninen burynǵy Keńes Odaǵy quramynda bolǵan elderdiń  aldyna shyqty. Shynaıy damýdyń jarqyn úlgisin kórsetti. Memlekettik qyzmet birinshi kezekte memleketke degen  adaldyq pen patrıotızmniń úlgisi bolýy kerek. Táýelsizdik alǵan jyldardan beri  osy salany damytý  úzdiksiz júrgizilý ústinde. Memleketke  adaldyq eń aldymen onyń zańdaryn oryndaý bolyp tabylady. Ár qyzmetker qazir Ata Zańymyzdy  bilmeı qyzmetke kirispeıdi. Sybaılas jemqorlyq, halyqtyń mańdaı terimen kelgen  qazyna qarjysyna qol salý, laýazymdy qyzmetin óz qaraqan basynyń qamy úshin asyra paıdalaný  sııaqty pendeshilikter memleket  irgesin shaıqaltatyn indet. Ár memlekettik qyzmetker  eldi osyndaı  jat qubylystan saqtaýy, sonyń jolyna qarsy tura bilýi kerek. Táýelsizdigimizdiń 20 jyldyq toıy  elimizdiń az jylda asqaraly  bıikterge kóterilýiniń saltanaty  ispetti. Osy jolda  elimizdegi ár memlekettik qyzmetshiniń de úlesi bar.  О́ıtkeni, memlekettik qyzmetshi – halyq qyzmetshisi. Bizdiń táýelsiz elimizde júzege asyrylyp jatqan ǵalamat ister men tolaǵaı tabystardyń barlyǵy da halyq ıgiligi úshin dep bilemiz.  Memleket úshin, halyq úshin  qyzmet etkenimdi maqtan tutamyn.  El ıgiligi arta bersin dep tileıik. Jánibek BAIJANOV, Memlekettik qyzmet isteri jónindegi agenttiktiń Qostanaı oblysy  boıynsha basqarma  bastyǵynyń orynbasary.   Birlik pen yntymaq Otany Táýelsizdiktiń 20 jyldyq torqaly toıyn eleýli jetistiktermen qarsy alyp otyrǵan elimiz qýanyshy Otanyn súıgen ár adamnyń ortaq shattyǵy ekeni talassyz. Tarıhtyń qysqa merziminde qıyn joldan ótip, jeńis dámin tatyp, álemdegi irgeli memleketter qataryna qosylǵan súıikti Qazaqstanymyz mereıiniń óse berýi júrektegi eń ystyq tilek. Soǵan tileýqor bolyp qana qoımaı, gúldenip, kórkeıýine ózindik úles qosýdy   azamattyq paryzym men qaryzym sanaımyn.  Osy oraıda júktelgen mindetti, Elbasy senimin adal atqara ala júrgenimdi kóńilge medet tutamyn. Men jetekshilik etetin «Fıtohımııa» halyqaralyq ǵylymı-ón­di­ristik holdıngi otandyq biregeı fıtopreparattardy jasaýda biraz jyl­dan beri jemisti jumys istep keledi. Jergilikti ósimdikterden, onyń ózinde  dalanyń  kádimgi tyqyr jýsanynan jasalatyn dárilik  zattar  res­pýb­lıkadan tysqary jerlerge de málim. Memleket basshysy N.Na­zarbaevtyń  tapsyrmasyna sáıkes ishki tutynymda da otandyq farmasevtıka ónimi kólemin aldaǵy ýaqytta 50 paıyzǵa jetkizý mindeti tur. Ony oryndaýǵa kúsh-qabiletimiz jetkilikti. Nursultan Ábishulynyń qoldaýymen salynǵan óndiristik keshen soǵan tolyq múmkindik beredi. Biz  qazir qandaı da iri isti atqara alamyz. Qazir jalyndap  jumys isteıtin zaman. Qaırat qaırar kez. Aldan jaqsylyqtar oty jyltyraıdy. Sony jarqyratýǵa árqaısymyz úles qosa, týǵan el ıgiligine bir dán sebe bileıik.   Bárimizdi ortaq múddege toǵystyrǵan Elbasy saıasatynyń altyn arqaýy   yntymaq pen birlik berkı tússin. Serǵazy ÁDEKENOV, UǴA akademıgi, Memlekettik syılyqtyń laýreaty. Qaraǵandy.   Úlesimizdi maqtan tutamyz Qazaqstannyń tabıǵı baılyǵy­nyń biri – munaı men gaz. Biraq KSRO degen alyp eldiń quramynda bolǵan jyldary bul baılyqtyń ıgi­ligin kóre alǵan joqpyz. О́n­dirilgen ónimniń tabysy aldymen orta­lyq­tyń ortaq qazanyna qu­ıylýshy edi ǵoı. Al elimiz táýel­sizdigin al­ǵan soń jaǵdaı óz­gerdi. Aldymen, mu­naı­shylardyń áleýmettik ahýaly jaq­sardy. Ken oryndarynda jaıly ja­taq­hanalar men ashanalar salyn­dy. Jalaqy da molaıdy. Eń bas­ty­sy, qazaq munaıynyń ıgiligin el kóre bastady. Táýelsizdiktiń 20 jylynda mu­naı-gaz ónerkásibi otandyq ekono­m­ı­­kanyń qozǵaýshy salasyna aı­na­­lyp, jańa jumys oryndaryn qu­rý­ǵa, ózge de salalardyń damýy­na jol ashty. Salada jańa ken oryndary ashyl­dy. Sonyń biri –biz munaı óndiretin Kenbaı ken orny. Bul kenish 1995 jyly Tuń­ǵysh Prezıdentimiz Nur­sultan Nazarbaevtyń ar­naıy qaty­sýymen mu­naı bere bastady. Sodan beri mun­da birneshe jumys orny qu­ryl­dy, munaı men gaz úzdiksiz óndi­ri­lip keledi. Biz, ıaǵnı otandyq munaı­shy­lar El­basy tusaýyn kesken kenishten ulttyq ekonomıkany órken­de­tý­ge yq­pal etken mol munaı óndirý­men  mol úles qos­qanymyzdy maqtan tutamyz. Aldaǵy kezeńde de Qazaq­stannyń «qara altyn» qory ortaımaı, álem­degi munaıy mol jetekshi elderdiń qatarynan oryn alsa, ekonomı­ka­myz­dyń órken­deýindegi qarqyn báseń­de­meıdi dep oılaı­myn. Elimizdiń ty­nysh­tyǵy buzyl­maı, alǵa órlegen tal­pynysymyz baıandy bolǵaı. Kók baıraǵymyzdy bıikte jelbiretetin jaqsylyǵymyz kóbeıe bergeı! Ádiljan IZIMBERGENOV,  «QaınarMunaıGaz» basqarmasynyń operatory. Atyraý oblysy.   Ustazǵa kóńil aıryqsha Jasyratyn nesi bar, Keńes ókimeti tusynda qoǵamdaǵy eń qa­dirli mamandyq muǵalim men dáriger edi. Ásirese, ustazdyń jóni bólek bolatyn. Jas balaǵa bilim nárin quıyp, ómirlik baǵyt-baǵ­daryn aıqyndaıtyn mamandyq ıelerin jurt erekshe qadir­leı­tin. Degenmen, azattyq alǵan jyldary muǵalimnen qadir ketti. Az ǵana jalaqyǵa baılandy. Jaǵdaıy bolmady. Odan beri de jıyrma jyl ótipti. Elbasy – Ult kóshbasshysy o bastan-aq ekonomıkaǵa basa kóńil aýdarǵany belgili. «Aldymen – ekonomıka, sosyn – saıasat» degen tujyrym bizdi tyǵyryqtan alyp shyqty. Áleýmettik mańyzy zor jobalar qolǵa alyndy.  Munyń bári ózdiginen bola qalǵan joq. El úshin jasalǵan ıgiliktiń barlyǵy Prezıdent Nursultan Nazarbaevtyń qajyr-qaıraty, aqyl-parasaty, «qazaqty qaıtsem basqadan kem qylmaı­myn» degen arman-ańsarynan týǵany shyǵar kúndeı aqıqat. Joǵaryda muǵalimderdiń jaǵdaıyn beker aıtqan joqpyz. Sońǵy on jyldyń kóleminde muǵalimge degen kózqaras ózgerdi. Ásirese, memleket tarapynan jasalyp jatqan qamqor­lyq aıryqsha baıqalady. Baıaǵy babalarymyz «ózińnen týmaı ul bolmas» degen eken. Sol sekildi óz bıligimiz ózimizge tıip, elimizdi óz azamatymyz basqaryp, qolymyz aýzymyzǵa jetti. Halyqqa barynsha jaǵdaı jasaldy. Osynyń bári atyńnan aınalaıyn Azattyq­tyń arqasy. Táýelsizdik tuǵyrly bolsyn! Nurgúl BAEKEEVA, №197 mekteptiń muǵalimi. Qyzylorda.   Bul – naǵyz ulyq mereke Semeı – elimizdiń shyǵysy men soltústigindegi qazaqy qala. Qazir­de jergilikti turǵyndar qala halqynyń jartysynan asyp ketken bolar. Munda sondaı-aq basqa da etnos ókilderi barshylyq. Áıtse de, sany jaǵynan qazaqtardan keıin orystar men tatarlar basqalarǵa qa­raǵanda edáýir basym. Solaı deı turǵanmen, munda qaı ulttyń bol­syn óz  etnomádenı birlestikteri turaqty túrde jumys istep keledi. Sonyń biri – bizdiń birlestik. Meniń de bul birlestiktiń tizginin qolyma alǵanyma birshama jyl bolyp qaldy. Tizbelep aıta bersek, osy jyldar aralyǵynda atqarǵan jumystarymyz bar­shy­lyq. Sonyń ishinde Semeıde álem tatarlarynyń kongresin ótkizgenimizdi maqtanysh tutamyz. Jylda sabantoı merekesin ótkizetinimiz munyń syrtynda. Ortalyǵymyzda sondaı-aq tatar óner mektebi turaqty túrde jumys istep keledi. Onda basqa etnostardyń jas talanttary da óz ónerlerin ushtaı túsýde. Semeıde bıyl Dostyq úıi óz aldyna mekeme bolyp ashyldy. Sóıtip, munda túrli mádenı ortalyqtardyń odan ári damı túsýine barlyq qolaıly jaǵdaı jasalǵan. Olardyń qaı qaısysy bolsyn ortaq merekelerden syrt qalyp otyrǵan joq. Ásirese, bıylǵy Táýelsizdigimizdiń jıyrma jyldyǵy jylynda tize qosyp, ózara birliktiń úlgi-ónegesin kórsetýge barymyzdy saldyq. Iá, birlik bar jerde tirlik bar deıdi. Osyndaı birligimiz eshqashan ydyramasyn. Táýelsizdik  kúni qutty bolsyn! Ǵabdýlhaq AHÝNJANOV, tatar ulttyq etnomádenı birlestiginiń jetekshisi. Semeı.   Naqty istiń ýaqyty Qarapaıym jumysshy bolsam da kúndelikti jańalyqtardan habardar bolyp, ómir kóshinen qalmaýǵa tyrysamyn. Bul – ómir zańdylyǵy. О́ıtkeni, kúndelikti turmystaǵy adamǵa qajettiliktermen qamtylýy zańdylyq deýge bolady. Sonyń dáleli Uzynaǵash aýylynyń ońtústiginde 35 jeke nesıelik úı salynyp, memlekettik jáne bıýdjettik mekeme qyzmetkerleri, taǵy basqa zárý otbasylaryna berildi. Jas otbasy retinde men de baspanaly boldym. Bul – elimizdegi jastarǵa kórsetilgen birden-bir qamqorlyq. Qazir Altyn alqaly 10 bala tárbıelegen anam men balalarym Sholpan, Nur-Islam jyly, ári jaıly úıde turyp jatyr. Memlekettik turǵyn úı baǵdarlamasyn júzege asyrýda tııanaqty jumystar atqarǵan oblys, aýdan basshylaryna alǵys aıtyp, eńbegimdi eseleı túsýdemin. Qazaqstandyqtar Táýelsizdik mereıine erekshe daıyndyqpen keldi. Máselen, Uzynaǵash aýylynda balalardyń ata-baba rýhyn qasterlep, eljandylyqty boılaryna darytatyn mádenı oryndar, eńseli eskertkishter qatary tolyqty. Jyr dúldili Jambyl baba atyndaǵy saıabaq, aýǵan soǵysy ardagerlerine arnalǵan eskertkish, taǵy basqa oryndar solardyń qatarynda. Osynyń bári búgingi beıbit ómir men Prezıdenttiń halyqqa degen qamqorlyǵynyń nátıjesi ekenin túsinemiz. Jastarǵa bilim alyp, el erteńine úles qosýǵa múmkindik jasalǵany bir ǵanıbet. Men soǵan qýanamyn, ári jarqyn isterdiń jalǵasatynyna senemin. Erbol QUTBANQULOV, jumysshy. Almaty oblysy.