Aýyldaǵy modýldi kitaphana bazasynda ashylǵan kovorkıng ortalyǵy 4 alańnan turady. Sonyń biri «Relax» aımaǵynda bos ýaqytty tıimdi ótkizýge – karaokemen án aıtýǵa, dombyra, gıtara shertýge, óner, mýzyka taqyrybynda kitap oqýǵa, toǵyzqumalaq, shahmat, taǵy basqa oıyn oınaýǵa bolady. Al «Kids coworking center»-de balalar qaýipsiz saıttardy paıdalanyp, qolóner úıirmesine qatysady, qýyrshaq teatrynyń qoıylymdaryn tamashalaıdy. Al «Rýhanı jańǵyrý» alańynda túrli formattaǵy kitaphanalyq-aqparattyq resýrstardy paıdalaný, sheberlik-sabaqtaryn, zııatkerlik oıyndar, dárister ótkizý qarastyrylǵan.
Osy alańdaǵy English club-ta «Latyn álipbıi grafıkasy», «Kompıýterlik saýattylyq», «Shyǵarmashylyq atmosfera» buryshtary jasaqtalǵan. Open-space ashyq keńistik alańy wi-fi aımaǵy retinde paıdalanýǵa berilip, munda bıznes-seriktestik, iskerlik qujattar jasaqtaýǵa bolady eken. Ortalyqta «Kınoman», «Mýltıman» klýbtary da jumys istemek.
Jańabulaqtaǵy jańa ortalyqtyń ashylý saltanatyna Astanadan «Azamattyq bastamalardy qoldaý ortalyǵy» kommersııalyq emes aksıonerlik qoǵamynyń tóraǵasy Nurlan О́teshov, Batys Qazaqstan oblystyq jastar saıasaty basqarmasynyń basshysy Aıan Saqoshev, J.Moldaǵalıev atyndaǵy oblystyq ǵylymı ámbebap kitaphanasynyń dırektory Sholpan Orazǵalıeva, H.Esenjanov atyndaǵy oblystyq balalar men jasóspirimder kitaphanasynyń dırektory Zvaıda О́teshova, bólim, mekeme basshylary, jastar, aýyl turǵyndary qatysty.
– Elbasy Nursultan Nazarbaevtyń tapsyrmasymen qolǵa alynǵan «Sıfrly Qazaqstan» baǵdarlamasy kitaphanalyq resýrstardy sıfrly formatqa kóshirýdi talap etedi. Jáne aýyl kitaphanalary tek qyzmet kórsetý mekemesi emes, zaman talabyna saı aýyldaǵy zııatkerlik demalys ornyna aınalýy tıis. Ashylǵan ortalyq osynyń aıǵaǵy, – dedi Aqjaıyq aýdanynyń ákimi Ádil Jolamanov.
Qazbek QUTTYMURATULY,
«Egemen Qazaqstan»
Batys Qazaqstan oblysy
