Qazir atalǵan aýdanda fosfor óndiretin eki iri zaýyt bar. Sonymen qatar qazirgi tańda aýdanda 2279 shaǵyn jáne orta kásipkerlik sýbektisi jumys isteıdi. Sarysý aýdany ákimdiginiń málimetinshe, olar memleketten nesıe alý baǵdarlamalaryn da ıgerip, ózin jáne ózgeni de jumyspen qamtıtyn jaǵdaıǵa jetken. Aýdan halqynyń 35 paıyzy, ıaǵnı 7644 azamat ónerkásip nemese kásipkerlik salasynda jumys isteıdi.
Búgingi tańda Jambyl oblysynda kásipkerlik keń óris alyp, bul baǵyt aýdandar ahýalyn arttyrýǵa ózindik úlesin qosyp otyr. Astana qalasynyń mereıtoıyna oraı «20 jyldyqqa – 20 nysan» aksııasy aıasynda birqatar aýdandarda kásipkerlik nysany ashylyp, óz jumysyn bastady. Sondaı kásipkerlik nysannyń biri Sarysý aýdanyndaǵy as tuzyn óndiretin jáne óńdeıtin «Asyl tuz» kompanııasy» jaýapkershiligi shekteýli seriktestigi. Jalpy quny 710 mıllıon teńgeni quraıtyn jobanyń qurylysy oblystyń kásipkerlikti qoldaý kartasyna engizilgen. Sonymen qatar atalǵan kásipkerlik nysanynyń óndiristik qýattylyǵy jylyna 50 myń tonnany quraıdy.
Sarysý aýdanynyń ákimi Balabek Narbaevtyń aıtýynsha, bul jańa óndiris ornynyń iske qosylýy óńirdiń áleýmettik-ekonomıkalyq damýyna oń áser etedi jáne óndiris órisin odan ári keńeıte túsedi. Endi as tuzyn shyǵaratyn kásiporynda 75 jańa jumys orny paıda bolady. Sondaı-aq atalǵan kásipkerlik nysan turǵyndardy jumyspen qamtý arqyly áleýmettik jaǵdaıdy jaqsartýǵa, salyq qazynasyn tolyqtyrýǵa da oń áserin tıgizedi.
Búgingi tańda atalǵan seriktestik aýdan ortalyǵynan 200 shaqyrym qashyqtyqta jatqan Jaılaýkól nemese Shyǵanaq jerindegi ken oryndarynan tuz tasyp jatqan bolsa, aldaǵy ýaqyttarda jaqyn jerlerdegi tuz kenderin barlaý jáne ıgerý jumystaryn bastaıdy. Qazirgi kezde atalǵan seriktestiktiń basty maqsaty shıkizat kólemin ulǵaıtý bolyp otyr. Eger shıkizat kóbeıse óndiristiń órisi keńeıip, qýaty da artatyn bolady.
Jumys barlyq talapqa saı bolý úshin búginde munda Reseı jáne Ýkraına memleketterinen qurylǵylar ákelinip, zaýyt tolyǵymen avtomattandyrylǵan. О́ndiris ornynyń tuz saqtaıtyn óz qoımasy da bar eken. Seh basshysy Jandos Shuǵaevtyń aıtýynsha, búginde óndirilgen as tuzyn Jambyl oblysynan bólek, Qaraǵandy oblysyna jáne kórshi Qyrǵyz Respýblıkasyna eksporttaý jumystary jolǵa qoıylǵan.
Osy ýaqytqa deıin «Qazfosfat» arqyly fosfor óndirýmen, «EýroHım» arqyly hımııalyq tyńaıtqyshtardy óńdeýmen aty shyqqan Sarysý aýdany endi as tuzyn óndirýde belsendilik tanytýda. Bul rette aýdan ákimdigi tarapynan tıisti qoldaý da bar. Jaqyn arada zaýytqa jergilikti ákimdik tarapynan temir jol tuıyǵyn salýǵa jáne elektr jaryǵymen qamtýǵa tıisti kóńil bólinbek.
Hamıt ESAMAN,
«Egemen Qazaqstan»
Jambyl oblysy
