Ábilqaıyr Jumabaıdyń jasy jetide. Ol Almatynyń irgesindegi Qaskeleń qalasynda turady. Aıaǵyn apyl-tapyl basqannan bastap án shyrqaýy ańsary aýǵan eken. Qazir aýdandyq Mádenıet úıi janyndaǵy mýzyka úıirmesinde ánshiliktiń qyr-syryn meńgerip júr. Ábilqaıyrdy ánshilikke baýlyp júrgen ustazy Qalbúbi Abdollaeva shákirtiniń bolashaǵynan úmitti. Qarshadaı uldy álemge tanymal án baıqaýyna atandyryp turǵanda senimi aldamapty.
Ábilqaıyr Vıtebskdegi baıqaýdyń alǵashqy kúni qazaqtyń halyq áni «Qaraǵym-aıdy» náshine keltirip shyrqap, qazylardyń joǵarǵy baǵasyna ıe boldy. Úlken sahnadan shyrqaǵan ekinshi áni de «qulaqqa kirip, boıdy aldy». Ol – ıtalııalyqtardyń «Melodrama» atty týyndysy eken.
Bıylǵy «Slavıan bazarynda» án shyrqaǵan jas talanttardyń ónerin baǵalaýshylar arasynda Dımash Qudaıbergen de boldy. Dúıim dúnıeni aýzyna qaratqan qazaq ánshisi Qaskeleńnen shyqqan qońyr úndi balaqaıǵa dán rıza bolypty. Ábilqaıyr da namysqa tyrysyp, jer-jerden jınalǵan 20 jetkinshektiń arasynan top jaryp, úshinshi orynnan kórindi. Al baıqaýdyń Gran-Prıni ýkraın balasy Aleksandr Balabanovqa buıyrdy.
Qalmahanbet MUQAMETQALI,
«Egemen Qazaqstan»
