Amerıkalyq «World Wide Motion Pictures Corporation» kompanııasy Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jáne «Novyı mır» Prodakshn» JShS-iniń birlese túsirgen «Anaǵa aparar jol» fılminiń soltústikamerıkalyq óńirde dıstrıbýsııalaý quqyǵyn satyp aldy. Esterińizge sala keteıik, atalǵan fılm byltyr Qazaqstan atynan «Oskar» jáne «Altyn globýs» «Úzdik shetel fılmi» atalymyna usynylǵan edi.
Bas prodıýseri Álııa Nazarbaeva, rejısseri Aqan Sataev bul fılmge kil juldyzdardy jınaǵan. «Anaǵa aparar jol» fılminde elimizdiń tanymal akterleri – Altynaı Nógerbek, Ádil Ahmetov, Arýjan Jazylbekova, Berik Aıtjanov, Bolat Ábdilmanov túsken. Bul epıkalyq fılmnen kórermen qazaq otbasynyń 1930 jyldardan bastap, kúni búginge deıingi bastan keshken taǵdyryn kóre alady.
«Prodıýserlerimizge, túsirilim tobyn jáne maǵan da fılmdi AQSh kınoteatrlarynda kórsetý – úlken abyroı. «World Wide Motion Pictures Corporation» kompanııasy fılmdegi shynaıylyqty kórip, ondaǵy oqıǵa jelisi álemniń barlyq aýdıtorııasyna uǵynyqty bolatynyna senim bildirgenine qýanyp otyrmyn», dedi bul jóninde rejısser Aqan Sataev.
«Birneshe urpaqtyń tarıhyn baıandaıtyn, onyń ústine «Oskar» syılyǵyna ilgeride usynylǵan tereń dramany prokattaýdy maqtan sanaımyz. Amerıkalyq otbasylar, ásirese analar qaýymy janǵa jylý syılaıtyn fılmdi qýana kóredi», dedi «World Wide Motion Pictures Corporation» kompanııasynyń bas dırektory Pol D.Henkok.
«Anaǵa aparar jol» fılmi AQSh-ta shekteýli prokatqa bıyl kúzde azııa-amerıkalyq uıymdardyń qoldaýymen shyǵady.
Aıta ketelik, «Anaǵa aparar jol» fılminiń tusaýkeseri 38-shi halyqaralyq Máskeý kınofestıvalinde ótip, synshylardyń oń baǵasyn alǵan. Sonymen qatar, fılm túrli kınofestıvalderden júlde alyp, halyqaralyq kórsetilimderi ótken. 19 shilde kúni osyndaı kórsetilim Vashıngtondaǵy Karnegı ınstıtýtynda «Rýhanı jańǵyrý» baǵdarlamasy aıasynda ótti.
Baǵashar TURSYNBAIULY,
«Egemen Qazaqstan»
