Qazaqtyń túgesilip bara jatqan asyl tuqymdy aqbas sıyrynyń izin indetip, Zerendi aýdanyna issaparǵa barǵanbyz. Aýylǵa ene bergenimizde qamshylar jaq qanattaǵy bir óńkeı jer úılerdiń albarynda bir top bala saýyryna áldene baılaǵan kókshýlan, dúregeı tóbetti qýalap júr eken. Shetin kóriniske nazar aýdarǵanbyz.
– It kóılek qoı, – dedi Qaraqalpaqstannan qonys aýdarǵan Múgilsim apaı, – týǵan elge táý etkeli dúnıege kelgen tuńǵysh nemerem. It kóılek degen sózdi estip pe edińizder.
– Estidik. Biraq...
– Jas sábı aıaǵyn apyl-tapyl basqanda kóılegin sheship alyp, jeńderin túıip, ishine tátti toqash, kámpıt, qurt salady da ıttiń arqasyna baılaıdy. Sodan soń álgi ıtti balalarǵa qýǵyzady. Qýyp jetkeni ıt arqalaǵan táttiden aýyz tımek. Sábıdiń boıyndaǵy dert bolsa, álgi ıtke kóshedi degen uǵym bar. Burynǵynyń josyǵy.
Áldeqashan el esinen shyqqan kóne yrym. San ǵasyr boıy dalanyń danalyǵyn jıǵan jurttyń joramaly, ǵurpy. Asyly burynǵylar birdeńe bilgen ǵoı.
Sábıdiń saýlyǵyna sebi tıer kóne yrymdy men de jasasam ba eken?..
Baıqal BAIÁDIL,
«Egemen Qazaqstan»
