Birinshi baǵyt ol - ınfraqurylymdy damytý. «Qazaqstanda 25 jyldyń ishinde 20 myń shaqyrym baılanys jelileri tartyldy. Endi, Prezıdent úsh jyldyń ishinde dál sondaı jospar oryndalsyn dep otyr. Osynyń nátıjesinde barlyq eldi mekenderde sapaly baılanys bolady. Demek, taǵy shamamen 3 mıllıon adamǵa baılanys jelileri tartylady», - dedi ol.
Ekinshi baǵyt - kreatıvti qoǵamdy qurý. Bul degenimiz, xalyq sıfrlandyrýdyń barlyq jańalyqtary - san alýan qosymshalar, onlaın qyzmetter jáne taǵy basqa ınnovasııalardy keńinen qoldanýy qajet. Ol úshin kreatıvti qoǵam, ıaǵnı zaman talabyn túsinetin azamattar kóp bolýy tıis. «Árıne, xalyq sıfrlandyrýdy túsinbese, osy saladaǵy sharalardy atqarý qıyn. Sol sebepti el azamattaryn sıfrlyq negizderge jan-jaqty úıretý týraly sheshim qabyldandy», - dedi ol.
Úshinshi baǵytqa sáıkes, otandyq ekonomıkany sıfrlandyrý qajet. Sonda eńbek ónimdiligi artady, barlyq prosester jyldam júredi. Baǵdarlamaǵa sáıkes, úsh jyldyń ishinde shamamen 120 kásiporyn elektrondy basqarý júıelerin engizedi.
«Tórtinshi baǵyt - sıfrlyq memleket. Barlyq anyqtamalar elektrondy formatta berilýi kerek.
Al besinshi baǵyt boıynsha biz tyń ıdeıalar men texnologııalar úshin orta qalyptastyrýymyz qajet», - dedi mınıstr Abaev.
Sonymen qatar, Mınıstr Abaevtyń aıtýynsha, búginde Qazaqstanda blokcheın texnologııasy negizinde birneshe joba qolǵa alyndy. Atap aıtqanda, Ulttyq bank óziniń qundy qaǵazdaryna deldalsyz qarjy quıý qyzmetin iske qosty. Bas prokýratýra ákimshilik quqyq buzýshylyqtardyń biryńǵaı reestrin qurýǵa kiristi. Al qarjy mınıstrligi qosarlanǵan qun salyǵyn ákimshilendirý boıynsha blokcheın texnologııasyn qoldanýdy kózdeıdi.
«Budan bólek, aýyl sharýashylyǵy, saýda men quqyqty tirkeý salasynda atalǵan texnologııany engizý jospary bar. Árıne, texnologııalyq transformasııa kezinde birlesip jumys istegen durys. Biz ony jaqsy túsinemiz. Osy oraıda G20 elderiniń tájirıbesin atap ótken jón. Olar krıptovalıýtalardy retteýdiń ortaq erejelerin ázirleýdi kózdeıdi. Negizi, biz qyrǵyz áriptesterimizben jaqsy jumys istep jatyrmyz. Eki jaqty formatta bolsyn, Eýrazııalyq ekonomıkalyq odaq aıasynda da birlesip jumys isteımiz», dedi D.Abaev.
Mınıstrdiń sózine qaraǵanda, búginde Astana hub pen Qyrǵyzstandaǵy Joǵary texnologııalar parki tyǵyz jumys jasaýǵa daıar. Osy áriptestik aıasynda krıptovalıýtalardy zertteý sharalary birlesip atqarylady degen senim bar.
Aıta keteıik, atalǵan jıynǵa Ońtústik Koreıa, Qyrǵyzstan, Belarýs pen Qazaqstannyń IT mamandary qatysty.
