A.Smaǵulov Qurmanǵazy atyndaǵy konservatorııany bitirip, drama akteri mamandyǵyn alyp shyqannan keıin eńbek jolyn Torǵaı oblysynda bastap, keıin Astanadaǵy Q.Qýanyshbaev atyndaǵy drama teatrynda jalǵastyrǵan. «Qyz Jibek» spektaklinde Bekejan rólin somdaǵany úshin Qazaqstannyń eńbek sińirgen ártisi ataǵyna ıe bolǵan. Tbılısıde ótken halyqaralyq jastar teatrlary festıvaliniń dıplomanty atanǵan.
Orta Azııa men Qazaqstan teatrlarynyń halyqaralyq baıqaýynyń Gran-prıin jeńip alǵan. «Apıyn», «Umytpa meni», «Kóshpendiler», «Birjan sal», «Elim-aı» «Qazaq handyǵy» fılmderinde basty jáne qosalqy rólderdi beınelegen. Belgili teatr synshysy Áshirbek Syǵaı «Muzbalaq qaraqshy, qarajúrek kázzap Bekejandy sál-pál súıkimdilikke súırelegen, onyń susty júzine az-kem qan júgirtken alash akteri Asylbolat Smaǵulov boldy» dese, Qazaqstannyń halyq jazýshysy Sáken Júnisov «Qyz Jibektegi» «Asylbolat-Bekejan» – qazaq teatry sahnasyndaǵy úlken qubylys» ekenin atap kórsetken.
Kórmeniń ashylý rásiminde Aıdarbek Seıpiluly kásibı akterge oblys ákiminiń qurmet gramotasyn saltanatty túrde tabys etip, shyǵarmashylyq jolynyń tabysty jalǵasa berýine tilektestik bildirdi. Jan dosy Á.Báımenov «segiz qyrly, bir syrly» tulǵanyń aqyndyq, sazgerlik, ánshilik, músinshilik, sýretshilik qabiletteri jaıly keńinen áńgimelep berdi.
Qylqalam qudireti arqyly sýretshilik talantyn tanyta bilgen jerlesimiz kórmege 40-tan astam keskindeme jáne grafıka jumystaryn usyndy. Túrli janrdaǵy sýretter, janrlyq kompozısııalar, portretter, peızajdar da ózindik oryndalýymen erekshelenedi.
– Bala kezimnen sýret salýǵa óte áýes boldym. Qabyrǵalarǵa Vasnesovtyń «Úsh batyryn», basqa sýretterdi salyp qoıatynmyn. Jas ulǵaıa kele shyndap aınalysa bastadym. Sýretterim – jan dúnıemniń aınasy ispettes. Qaı-qaısysynda bolsyn týǵan jerge degen balalyq saǵynyshym men perzenttik tolǵanysymdy sýret tilinde «sóıletýge» umtyldym, – deıdi Asylbolat Smaǵulov.
Shynynda da «Ýaqyt», «Ana», «Shyrmaýyq, jalǵan dúnıe», «Asaý kúreń», «Qalyńdyq» taǵy basqa kartınalardyń kásibı sýretshiniń týyndylarynan esh aıyrmasy joq. Qorqyt, Aqan seri, Baıan Sulý, Qyz Jibek, Bekejan portretteri de ózindik daralyǵymen sıpattalady.
Ol beıneleý óneri murajaıyna birneshe týyndysyn syıǵa tartty.
О́mir ESQALI,
«Egemen Qazaqstan»
Soltústik Qazaqstan oblysy
