Dúısenbi kúni «Bomba», «Bahroma» men «Mıshka na polıýse» sekildi Qazaqstanda shyǵarylatyn balmuzdaqtardyń 10 tonnasy Almatydan Shanhaıǵa jóneltildi». Endigi jerde Shanhaıda joǵarydaǵy brendterdiń ıesi, ıaǵnı «Shın-Laın» kompanııasynyń óz qoımasy bar. Budan bylaı Qytaıdaǵy ortalyq habtan qazaqstandyq balmuzdaqtar eldiń soltústik aımaǵyna, shyǵys jáne ońtústik-shyǵys óńirine jetkiziledi.
Atalmysh kompanııa bıyl Qytaı naryǵyna 200 tonna balmuzdaq aparýdy josparlap otyr. «Shın-Laın» balmuzdaqtaryn qytaılyqtar asyǵa kútýde. О́ıtkeni 2017 jyly bul kompanııa úsh birdeı mamandandyrylǵan kórmege qatysyp 100 dıstrıbıýtormen kelisimge kelgen.
«Bul degenińiz – jyl oqıǵasy. Biz Qytaıǵa balmuzdaq óndiretin alǵashqy qazaqstandyq kompanııamyz. Kórshiles memlekettiń naryǵyna shyǵý – úlken eńbektiń nátıjesi. Elimizdiń Aýyl sharýashylyǵy mınıstrligi men «Atameken» Ulttyq kásipkerler palatasy qazaqstandyq ónimniń Qytaı naryǵyna shyǵýyna septesip, balmuzdaqty eksporttaýdaǵy biraz shekteýlerdi alyp tastaýǵa kómegin tıgizdi. Búginnen bastap biz Qytaıǵa eksportty bastap, óz ónimderimizdiń kórshi eldegi úlesin 3 paıyzǵa arttyrdyq» – dedi «Shın-Laın» kompanııalar tobynyń prezıdenti Andreı Shın.
Eksporttyń ósý keleshegi suranyspen tikeleı baılanysty. Jalpy álemde óndiriletin barlyq balmuzdaqtyń úshten birin qytaılyqtar jeıdi. 2014 jyly Qytaıdyń balmuzdaq naryǵy AQSh-ty basyp ozǵan.
Andreı Shınniń aıtýynsha, Reseı men Qytaıdyń eksport naryǵynda usynys óte kóp. Sondyqtan otandyq kompanııaǵa naryq suranysyna saı keletin ónim usyný mańyzdy.
Nátıjesinde atalmysh kompanııa ábden zertteý júrgizip, ónimniń jańa quramyn jasap, tehnologııalyq oryndalýyn ózgertip, balmuzdaqtardyń qaptamasyna deıin jańartqan. Ujym joǵary sapaly ónim daıyndaýǵa 1,5 jyl ýaqyt jumsap, jalpy somasy 5 mıllıon eýro qarajat quıǵan.
«Shın-Laın» balmuzdaqtarynyń Qytaıǵa eksporttalýynda ózge de mańyzdy tustar bar. Elbasy bekitken memlekettik baǵdarlamalarda elge ınvestısııa tartý týraly jıi aıtylady. Bul óz kezeginde qazaqstandyq ónimniń áleýetin arttyrmaq. Otandyq balmuzdaqtyń sapasyn kóterý arqyly eksportqa shyǵý sııaqty qıyn másele sheshildi. Bolashaqta óndiris kólemi arta beredi degen senim mol.
Aınash ESALI,
«Egemen Qazaqstan»
ALMATY
