Toqsan bes jyldyq tarıhy bar Leroy Merlin saýda kompanııasy dúnıejúzi boıynsha qurylysqa arnalǵan kerek-jaraq satýmen tanymal bolǵan kóne saýda jelisiniń qatarynda. Qazir «Leroy Merlinniń» dúkenderi jer sharynyń túkir-túkpirinde ashylǵan. Barlyǵy 325 saýda jelisin quraıtyn alyp júıege Túrkııa, Grekııa, Brazılıa, Italııa, Polsha, Portýgalııa, Ispanııa, Qytaı, Reseı, Ýkraına sııaqty 12 memlekettetiń tutynýshylary qosylǵan. Qarasaý aýdanynda ashylǵan shyt jańa saýda úıi elimizdegi ǵana emes, Orta Azııadaǵy alǵashqyqylar sanatynda eken. Búginde saýda ımperııasynyń álemdegi qyzmetkerleriniń sany 88 500 adamdy quraıtyn bolsa, Qazaqstandaǵy gıpermarkette taǵy 370 adam jumyspen qamtylyp otyr. Byltyr saýda brendiniń aınalymdaǵy qarjysy 18,2 mlrd eýrony qurapty.
Almaty oblysynyń aýmaǵynda ashylǵan saýda úıiniń ashylý saltanatyna Fransııanyń Qazaqstandaǵy elshisi Fılıpp Martını, Almaty oblysynyń əkimi Amandyq Batalov jəne bıznes ókilderi qatysty. Jıynda sóz alǵan oblys basshysy A. Batalov əlemdik deńgeıdegi úlken jeliniń Almaty oblysynan ashylýy jetisýlyqtar úshin qýanysh ekenin aıtty.
- Oblys aýmaǵynda ashylǵan iri gıpermarket jobasy arqyly óńirge 6 mlrd. teńge ınvestısııa tartylyp otyr. Munda 370 jańa jumys orny quryldy. Kóptegen jastar jumysqa ornalasty. Bıyldan bastap Elbasynyń bastamasymen «7.20.25» baǵdarlamasynyń negizinde turǵyn úı salý qarqyndy júrgiziletin bolady. Sol úılerdi turǵyzýda, ərleýde paıdalanylatyn materıaldardyń balyǵy osy sórelerden tabylatynyna senimdimin. Kompanııa jetekshileri qazirdiń ózinde qyrqtan astam otandyq taýar óndirýshimen kelisimshart jasasyp úlgeripti. Soǵan səıkes taýar baǵasy da qoljetimdi bolyp, zaýyttardan tikeleı osy saýda sóresi arqyly tutynýshyǵa jetkizilýi quptarlyq is. Biz óz tarapymyzdan bıznesti damytýǵa barynsha qoldaý kórsete beremiz jəne təýelsiz jas memleketimizdiń ekonomıkasyn birge kóteremiz, - dedi aımaq basshysy óz sózinde.
Al Fransııanyń Qazaqstandaǵy elshisi Fılıpp Martını bıyl Qazaqstan men Fransııa arasyndaǵy baılanystyń ornaǵanyna 10 jyl tolǵanyn atap ótip, eki jaqty tıimdi áriptestiktiń jemisi nátıjeli ekenin aıtty. «Sonyń bir kórinisi álemge tanymal fransýz saýda brendiniń Qazaqstan naryǵyna qadam basýy» deıdi elshi.
Almaty mańynan ashylǵan «Leroy Merlin» gıpermarketter jelisiniń dúkeni Qazaqstanda óndirilgen taýardy aınalymǵa shyǵarýǵa úles qosatyn bolady. Bul tutynýshylar úshin qoljetimdi baǵa saıasatyn ustanýǵa múmkindik beredi. Aldaǵy kúnderi «Leroy Merlin» brendimen taǵy da 3 dúken ashylmaqshy.
Qalmahanbet MUQAMETQALI,
«Egemen Qazaqstan»
Almaty oblysy
