27-29 shilde aralyǵynda Qytaıdyń Harbın qalasynda MMA Búkilálemdik Qaýymdastyǵynyń tujyrymdamasy boıynsha MMA-dan V Azııa chempıonaty ótti. Erekshe aýyz toltyryp aıtarlyq jaıt, Azııanyń eń myqty MMA sheberleriniń basyn qosqan bul dúbirli dodada Qazaqstannyń ulttyq quramasy top jaryp, komandalyq esepte jeńiske jetti.
Qazaqstandyq sportshylar barlyq on salmaq dárejesinde synǵa túsip (8 er, 2 áıel) 3 altyn, 5 kúmis pen 1 qola alqany elimizdiń qorjynyna saldy.
Atap aıtsaq, Nurjamal Sadyqova (áıelder arasynda 52 kg deıingi salmaq dárjesinde), Aslan Oraz (70.3 kg deıingi salmaq dárjesinde), Nurnııaz Qoshbaev (+93 kg salmaq dárjesinde) qarsylastyryn oısyrata utyp, chempıon atansa, Aqbóbek Erǵalıeva (áıelder arasynda 61 kg deıingi salmaq dárejesinde), Talǵat Jumaǵalıev (56.7 kg deıingi salmaq dárjesinde), Dastan Amangeldi (61.2 kg deıingi salmaq dárejesinde), Nurbek Qabdyrahmanov (65.8 kg deıingi salmaq dárejesinde), Murad Abdýrahmanov (93 kg deıingi salmaq dárjesinde) kúmis alqany ıelendi. Al, qola medaldi Dýman Balmuhanov (84 kg deıingi salmaq dárejesinde) qanjyǵasyna baılady.
Jalpy komandalyq esepte Qytaı eliniń sportshylary ekinshi oryndy ıelenip, qyrǵystandyq MMA sheberleri úshinshi oryndy enshilese, Qazaqstan quramasy sýyrylyp alǵa shyǵyp, bul myqtylar úshtiginde kósh bastady.
Endigi kezekte MMA-dan elimizdiń ulttyq quramasy qyrkúıek aıynda Qytaıdyń Beıjiń qalasynda IMMAF tujyrymy boıynsha ıýnıorlar arasynda ótetin Azııa chempıonaty men álem chempıonatyna jáne aǵymdaǵy jyldyń qarashasynda Bahreınde shymyldyǵyn túretin birikken álem chempıonatyna daıyndalatyn bolady. Bahreınde ótetin atalǵan chempıonatta tuńǵysh ret álemdegi eń iri eki áýesqoı MMA federasııalarynyń (WMMAA jáne IMMAF) ókilderi kezdespek.
