Aq-qara túste túsirilgen melodrama (jumys ataýy«Qala ústinde»/«Nad gorodom») festıvaldiń jabylý saltynatynda kósetiledi. Sondaı-aq Anonimul festıvalinde «Aslannyń sabaqtary» jáne «Tórt oqıǵa» fılmderinen kuralǵan Emır Baıǵazınniń retrospektıvasy ótedi. Bul kórsetilimder qazaqstandyq rejısserdiń «álemdik kınematograftyń sulýlyǵyna» qosqan úlesi úshin arnaıy uıymdastyrylyp otyr. Festıvaldiń «Kıno salasynyń damýyna qosqan úlesi úshin» arnaıy júldesin buryndary Pak Chhan-ýk (Ońtústik Koreıa), Ishtvan Sabo (Vengrııa), Mıshel Franko (Meksıka) syndy rejısserler ıelengen.
-Bıyl álem kınematografııasynyń jan-jaqty sulýlyǵana qosqan úlesi úshin júldeni Emır Baıǵazınge bergeli otyrmyz. Sońǵy bes jyl ishinde biz onyń shyǵarmashylyǵyn qyzyǵa qadaǵalap júrmiz. Onyń fılmderi bizdi shabyttandyryp, kúsh-qýat beredi, - dedi Anonimul kınofestıvaliniń dırektory Mırýna Bereský.
«Juldyzdardy kórgińiz kele me?» fılminiń túsirý jumystary Almaty qalasynda ótken. Fılmde saýda ortalyǵynyń birinde fast-fýd qyzmetshisi bolyp isteıtin jigittiń jasy úlken áıelmen tanysýy týraly baıandalady. Uzaq ýaqytqa sozylǵan kastıngtiń nátıjesinde basty rólderge áýesqoı akterler Tatıana Sım men Baýyrjan Núrkeev bekitilgen.
Atalǵan kınojobaǵa ssenarıı jazý kezinde gollandııalyq Hubert Bals Fund atty qory qoldaý bildirgen. Kartınanyń mýzykasyn Aleksandr Vlaznev jazǵan. Emır Baıǵazın bul fılmde prodıýser qyzmetin de atqarǵan.
Anonimul Halyqaralyq avtorlyq fılmderdiń festıvali Dýnaı saǵasynda osymen 15-shi ret ótkiziledi. Onyń tujyrymdamasy – jas kórermender aýdıtorııasy, tabıǵatpen etene bolý jáne formaldy oılaýdan bas tartýǵa baǵyttalǵan. Fılmdi festıvaldiń kórermenderine Emır Baıǵazınmen birge kartınanyń qoıýshy sýretshisi Aıdana Qojageldına tanystyratyn bolady.
Esterińizge sala ketsek, Emır Baıǵazınniń Aslan týraly trılogııanyń sońǵy bólimi – «О́zen» fılminiń álemdik tusaýkeseri 75-shi Venesııa kınofestıvalinde ótedi.
