Baıqaýdyń maqsaty- kompozıtor Shámshi Qaldaıaqovtyń shyǵarmalaryn dáripteý, halyq arasynda án ónerin damytý, qazaq ánderin oryndaýshylar arasynan jas talant ıelerin anyqtap kásibı baǵdar berý, jeke shyǵarmashyl tulǵalardyń qalyptasýyna yqpal etý, ánshilerdiń oryndaý sheberlikterin arttyra otyryp olarǵa qoldaý kórsetý jáne otansúıgishtikke baýlý, ulttyq rýhta tárbıeleý.
Baıqaýdyń birinshi kezeńinde úmitkerler Sh.Qaldaıaqovtyń, ekinshi kezeńde Túrkistan oblysy kompozıtorlarynyń ánderin shyrqady.Syrly ánmen qazaq halqynyń bitim-bolmysyn, shynaıy beınesin sıpattap, án áleminde aıryqsha ornyn qaldyrǵan uly kompozıtor atyn ulyqtaıtyn dástúrli óner dodasynyń aýdan, qalada ótken birinshi kezeńine 200-ge jýyq úmitker ótinish bildirip, onyń ishinen 56 úmitker oblystyq baıqaýǵa joldama alǵan bolatyn. О́ner báıgesine 15 - 29 jas aralyǵyndaǵy úmitkerler qatysty.
Qazaqtyń mýzyka ónerinde Shámshiniń orny erekshe 300-ge jýyq ánderi bar.Baıqaýdyń bıylǵy jetistigi uly kompozıtordyń oryndalmaı júrgen 15-ten asa áni jaryqqa shyǵarylyp, arnaıy aspaptardyń súıemeldeýimen kórermenge jol tartty. Olardyń qatarynda "Kel, Býrabaıǵa", "Baıqońyr", "Kelin keldi", "Kókkóldegi keshter-aı", "Egiz maqta", "Ǵashyq kúnder" jáne Abaı Qunanbaevtyń sózine jazylǵan "Tyńda meni, dostarym" syndy ánder bar.
1992 jyldan beri dástúrge aınalǵan bul baıqaýdan elimizge tanymal Shakızada Baıbatjanova, Qurman Shoıynbaev, Sáýle Jeldibaeva, Marat Áıtimov, Nurǵalı Turlybekov, Hadısha Seıitova, Jubanysh Jeksenuly, Gúljazıra Qaıyrbekova, Toqtar Serikov, Asqar Júnisbekov, «Jigitter» kvarteti, Nurjan Júsipbekov, Mádihan Dúıseev, Ahynbekov Rýslan, «Saryn» toby syndy óner ıeleri qanat qaqqan.
Ońtústik Qazaqstan oblysy, Otyrar aýdany, Sháýildir aýylynda dúnıege kelgen asa kórekti sazger, án janrynyń áıgili maıtalmany, Qazaqstan mádenıetine eńbegi sińgen qaıratker, osy zamannyń qazaq estradasynyń negizin qalaýshy, Qazaqstannyń halyq ártisi, Shymkent, Taraz, Jetisaı qalalarynyń Qurmetti azamaty Shámshi Qaldaıaqov - ulttyq mýzyka óneriniń án janryna asa aıqyn, sońǵy lep ala kelgen tulǵa. Elge, jerge, Otan men ata-anaǵa degen súıispenshilik kompozıtor shyǵarmalarynyń basty taqyryby bolsa, sonyń ishinde, «Meniń elim», «Ana týraly jyr», «Baqyt qushaǵynda», «Teriskeı», «Arys jaǵasynda», «Otyrardaǵy toı», «О́mir-ózen» syndy kóptegen ánderi halyqtyń jattandy ómir jyryna aınalǵan.
Uly tulǵanyń biregeı óner jolyn dáripteýge arnalǵan baıqaýǵa qatysqan 21 ónerpaz aqtyq kezeńge joldama aldy.
