Besinshi Kaspıı sammıtinde jaǵalaý mańyndaǵy memleketterdiń ónerkásiptik, saýda, energetıkalyq, kóliktik-logıstıkalyq, ınnovasııalyq, týrıstik, aqparattyq jáne múddelilik tanytatyn basqa da salalardaǵy ózara is-qımylyn odan ári nyǵaıtýǵa jáne damytýǵa yqpal etetin Kaspıı mańy memleketteriniń úkimetteri arasyndaǵy saýda-ekonomıkalyq yntymaqtastyq týraly kelisimge jáne Kaspıı mańy memleketteriniń úkimetteri arasyndaǵy kólik salasyndaǵy yntymaqtastyq týraly kelisimge qol qoıý tereń qanaǵattanýshylyq sezimmen qabyldandy. Osy kelisimderdi iske asyrý úshin Kaspıı mańy memleketteriniń quzyretti vedomstvolarynyń kezdesýleri turaqty negizde ótkiziletin bolady.
Bes eldiń kásipkerleri men bıznes-qurylymdary arasyndaǵy baılanystardy damytý maqsatynda 2019 jyly Túrikmenstanda birinshi Kaspıı ekonomıkalyq forýmyn ótkizý usynyldy.
Kaspıı teńizinde teńiz kóligi salasynda tıimdi jáne ózara paıdaly yntymaqtyq jasaý maqsatynda jaǵalaý mańy memleketteri teńiz ákimshilikteriniń besjaqty turaqty ózara is-qımylyn uıymdastyrý mańyzdylyǵy basa kórsetildi. Kaspııdegi teńiz kóligi salasyndaǵy yntymaqtastyq týraly besjaqty kelisimdi daıyndaý qajettiligi atap ótildi.
Sammıt barysynda Kaspıı teńizindegi oqys oqıǵalardyń aldyn alý týraly úkimetaralyq kelisimge qol qoıý memleketterdiń ózara is-qımylynyń bazalyq qaǵıdattaryn – egemendikti, aýmaqtyq tutastyqty qurmetteýdi, bir-biriniń qaýipsizdigine nuqsan keltirmeýdi, áskerı qyzmet salasyndaǵy kelisilgen senim sharalaryn saqtaýdy óńirlik qaýipsizdik pen turaqtylyqty nyǵaıtý jónindegi ortaq kúsh-jigerge sáıkes boljamdylyq jáne transparenttilik rýhynda iske asyrýǵa baǵyttalǵan.
Jaǵalaý mańy memleketteriniń qaýipsizdik salasyndaǵy múddelerin qamtamasyz etý maqsatynda prezıdentter Kaspııde teńizdegi áskerı qyzmet salasyndaǵy kelisilgen senim sharalaryn ázirleý jáne qabyldaý qajettigin rastady.
Prezıdentter 2010 jylǵy 18 qarashadaǵy Kaspıı teńizindegi qaýipsizdik salasyndaǵy yntymaqtastyq týraly kelisimge ózekti syn-tegeýrinder men qaýip-qaterlerge qarsy is-qımyl jasaýǵa, sondaı-aq quqyqqa qarsy qyzmettiń jolyn kesýge baǵyttalǵan terrorızmge, uıymdasqan qylmysqa qarsy kúres salasyndaǵy yntymaqtastyq týraly, shekara vedomstvolarynyń ózara is-qımyly týraly hattamalarǵa qol qoıýdy quptady.
Kóshbasshylar Kaspııdegi qorshaǵan ortanyń jaı-kúıi máselelerine erekshe nazar aýdardy. 2018 jylǵy 20 shildede Máskeýde 2003 jylǵy 4 qarashadaǵy Kaspıı teńiziniń teńiz ortasyn qorǵaý jónindegi negizdemelik konvensııaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamaǵa qol qoıý Kaspıı mańy memleketteriniń osy baǵyttaǵy kúsh-jigeriniń asa mańyzdy qorytyndysy bolǵany atap ótildi. Oǵan qabyldanǵan hattamalardyń kúshine enýi úshin qajetti memleketishilik rásimderdi, sondaı-aq Konvensııa Hatshylyǵyn Kaspıı mańy memleketteriniń aýmaǵyna rotasııalyq negizde ornalastyrý prosesin aıaqtaý tapsyryldy.
Memleket basshylary 2014 jylǵy 29 qyrkúıektegi Astrahan sammıtinde qol qoıylǵan sý bıologııalyq resýrstaryn saqtaý jáne utymdy paıdalaný týraly, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly, sondaı-aq gıdrometeorologııa salasyndaǵy yntymaqtastyq týraly kelisimderdiń kúshine enýin quptady. Osy qujattardy praktıkalyq iske asyrý Kaspıı teńiziniń tabıǵı jáne tehnogendik sıpattaǵy qaýip-qaterlerden qorǵalýyn arttyrýǵa, onyń biregeı teńiz ortasy men bıologııalyq ártúrliligi úshin táýekelderdi azaıtýǵa yqpal etedi.
Prezıdentter 2010 jylǵy 18 qarashadaǵy Kaspıı teńizindegi qaýipsizdik salasyndaǵy yntymaqtastyq týraly kelisimdi iske asyrý maqsatynda Kaspııdiń balyq qorlarynyń saqtalýyna járdemdesýge jáne brakonerlikke qarsy is-qımyl jasaýǵa arnalǵan bıologııalyq resýrstardyń zańsyz kásipshiligine qarsy kúres salasyndaǵy yntymaqtastyq týraly hattamany, sondaı-aq teńizde júzý qaýipsizdigin qamtamasyz etý salasyndaǵy yntymaqtastyq týraly hattamany kelisýdi aıaqtaý qajettigin atap ótti. Esirtki quraldarynyń psıhotroptyq zattar men olardyń prekýrsorlarynyń zańsyz aınalymyna qarsy kúres týraly hattamany pysyqtaý tapsyryldy.
Memleket basshylary teńiz ben onyń jaǵalaý mańy aımaǵynyń eleýli mádenı jáne rekreasııalyq áleýetin eskere otyryp, Kaspıı óńirinde ekonomıkanyń týrıstik segmentin damytý mańyzdylyǵyn atap ótti. Tıisti organdarǵa Kaspııdegi týrızm taqyryby boıynsha besjaqty konsýltasııalar ótkizý tapsyryldy.
Prezıdentter óńirlik deńgeıdegi baılanystardy, mádenı almasýlardy, medıa-forýmdardy, jastar sletterin, sporttyq jarystardy jáne basqalaryn qosa alǵanda, Kaspıı mańy memleketteriniń ártúrli formattardaǵy yntymaqtastyǵyn jandandyrýǵa qoldaý bildirdi.
Prezıdentter Kaspıı teńiziniń beıbitshilik, kelisim, tatý kórshilik jáne tıimdi halyqaralyq yntymaqtastyq teńizi bolyp tabylatyndyǵyn erekshe atap ótip, barlyq Kaspıı mańy memleketteriniń arasyndaǵy dástúrli dostyq baılanystardyń odan ári nyǵaıatynyna jáne damıtynyna senim bildirdi.
Besinshi Kaspıı sammıtin joǵary deńgeıde uıymdastyrǵany jáne kórsetken qonaqjaılylyǵy úshin Qazaqstan Respýblıkasyna rızashylyq bildirildi.
Kelesi Kaspıı sammıti kelisilgen merzimde Túrikmenstanda ótedi.
