2017 jyly Qazaqstan Respýblıkasy Mádenıet jáne sport mınıstrliginiń bastamasymen Tuńǵysh Prezıdent kúni qarsańynda jaryqqa shyqqan, qazaqstandyq sýretshilerdiń eńbekterimen bezendirilgen «Úshqońyr» atty qanatty sózder jınaǵyna Elbasynyń júrekjardy tebirenisteri men týǵan jerine degen ystyq mahabbaty jaıly qanatty sózderi toptastyrylǵan.
Sharanyń ashylý saltanatynda sóz alǵan Ulttyq mýzeı dırektorynyń orynbasary Maral Baltyshev: «Bul kórmede Elbasynyń balalyq shaǵynan bastap, memleket qaıratkerine deıingi qalyptasý jolymen qylqalam sheberleriniń týyndylary arqyly tanysa alasyzdar. Elbasymyzdyń barlyq ómir joly – egemen elimizdiń órkendep ósýine qyzmet etýdiń jarqyn úlgisi bolyp tabylady.
Bizdiń eń basty qundylyǵymyz – Otanymyz ben Táýelsiz Qazaqstan. Memleket basshysy Qazaqstan tarıhyndaǵy sheshýshi kezeńde erkindik pen Táýelsizdikti ańsaǵan halyqtyń asyl armanyn oryndady. Búgingi kórme Elbasymyz Nursultan Nazarbaevtyń arman-ańsaryn, maqsat-múddesin aıqyn kórsetedi dep oılaımyn», dedi.
«Úshqońyr» kórmesi Qazaqstannyń Tuńǵysh Prezıdenti Nursultan Ábishuly Nazarbaevtyń týǵan ólkesi Úshqońyr eldi mekenine arnalǵan. Elbasy óziniń árbir Joldaýlarynda, áńgimelerinde, Úshqońyr jaıly kitaptarynda Otan jaıly syr sherte kele, ata-baba jeriniń rýhanı qoldaýshy retinde qalaı jelep-jebep júretindigin qaıtalaýdan jalyqqan emes.
«Zolotaıa knıga» baspa úıiniń bas redaktory Vıacheslav Tıtenev: «Úshqońyr» jınaǵy Rýhanı jańǵyrý baǵdarlamasy aıasynda júzege asyrylǵan joba. Bul kitap arqyly Elbasynyń týǵan jerine degen mahabbatyn kórsetkimiz keldi. Ár adamnyń týǵan jeri – onyń ystyq mekeni. Qarapaıym otbasynda, qazaq aýylynda tárbıelengen aýyl balasynan Memleket basshysy qalaı qalyptasqanyn sýretter arqyly nasıhattaǵymyz keldi. Elbasynyń estelikterin sýretpen beınelep berdik», dep «Úshqońyr» kitaby týraly aıtyp ótti.
Kórmege B.Armat, A.Chýnchalınov, H.Qıqımov, J.Abdraman, B.Nurmaǵanbetov, V.Slabospıskaıa, T.Baıǵalıev, Qazaqstan Ulttyq mýzeıi qorynan Á.Qasteev, S.Aıtbaevtyń jáne t.b. sýretshilerdiń týyndylary qoıylǵan.
Baǵashar TURSYNBAIULY,
«Egemen Qazaqstan»
